ᱟᱹᱛᱩ ᱵᱮᱨᱮᱞ
ᱫᱤᱞᱞᱤ ᱨᱮ ᱥᱟᱱᱛᱟᱲ ᱡᱟᱹᱛᱤ ᱜᱤᱨᱟᱹᱵᱟᱹᱥᱤ ᱠᱟᱛᱮ ᱟᱹᱛᱩ ᱠᱚ ᱵᱮᱨᱮᱫ ᱠᱮᱫᱟ ᱾ ᱵᱟᱰᱟᱭᱚᱜ ᱠᱟᱱᱟ, ᱑᱙᱙᱐ ᱥᱟᱹᱦᱤᱛ ᱠᱷᱚᱱᱜᱮ ᱚᱱᱟ ᱟᱹᱛᱩ ᱨᱮ ᱥᱟᱱᱛᱟᱲ ᱦᱚᱲ ᱠᱚ ᱜᱤᱨᱟᱹᱵᱟᱹᱥᱤ ᱞᱮᱱᱟ ᱾ ᱤᱱᱟᱹ ᱛᱟᱭᱚᱢ ᱚᱱᱟ ᱟᱹᱛᱩ ᱨᱮ ᱵᱟᱹᱭᱼᱵᱟᱹᱭᱛᱮ ᱟᱹᱰᱤᱜᱟᱱ ᱥᱟᱱᱛᱟᱲ ᱡᱟᱹᱛᱤ ᱠᱚ ᱜᱤᱨᱟᱹᱵᱟᱹᱥᱤ ᱟᱠᱟᱱᱟ ᱚᱱᱟ ᱛᱮ ᱢᱤᱫᱴᱟᱝ ᱟᱹᱛᱩ ᱜᱮᱠᱚ ᱵᱮᱨᱮᱫ ᱟᱠᱟᱫᱟ ᱾ ᱡᱟᱦᱟᱸ ᱯᱚᱥᱪᱤᱢ ᱫᱤᱞᱞᱤ ᱵᱤᱠᱟᱥ ᱱᱚᱜᱚᱨ ᱨᱮ ᱟᱹᱛᱩ ᱠᱚ ᱵᱮᱨᱮᱫ ᱟᱠᱟᱫᱟ, ᱚᱱᱟ ᱨᱮᱭᱟᱜ ᱧᱩᱛᱩᱢ ᱫᱚ ᱥᱟᱱᱛᱟᱞ ᱡᱟᱹᱛᱤ ᱵᱟᱥᱟ ᱰᱮᱨᱟ ᱟᱹᱛᱩ ᱾
ᱢᱟᱹᱡᱷᱤ ᱪᱷᱟᱹᱴᱭᱟᱹᱨ
ᱥᱟᱱᱛᱟᱞ ᱡᱟᱹᱛᱤ ᱵᱟᱥᱟ ᱰᱮᱨᱟ ᱟᱹᱛᱩ ᱨᱮ, ᱟᱹᱛᱩ ᱢᱚᱲᱮ ᱦᱚᱲ ᱵᱟᱝ ᱠᱚ ᱛᱟᱦᱮᱸ ᱠᱟᱱᱟ ᱢᱮᱱᱮᱫ ᱢᱟᱹᱡᱷᱤ ᱯᱟᱨᱟᱱᱤᱠ ᱱᱟᱭᱠᱮ ᱜᱚᱰᱮᱛ ᱡᱚᱜᱽᱢᱟᱹᱡᱷᱤ ᱵᱟᱝ ᱠᱚ ᱛᱟᱦᱮᱸ ᱠᱟᱱᱟ ᱾ ᱯᱟᱨᱚᱢᱮᱱ ᱗ ᱰᱤᱥᱤᱢᱵᱚᱨ ᱦᱤᱞᱳᱜ ᱯᱚᱥᱪᱤᱢ ᱵᱟᱝᱞᱟ ᱠᱷᱚᱱ ᱥᱟᱹᱨᱤ ᱫᱷᱚᱨᱢ ᱥᱟᱸᱜᱷᱟᱨ ᱜᱩᱨᱩ ᱵᱟᱵᱟ ᱠᱚ ᱪᱟᱞᱟᱣ ᱠᱟᱛᱮ, ᱥᱟᱱᱛᱟᱞ ᱡᱟᱹᱛᱤ ᱵᱟᱥᱟ ᱰᱮᱨᱟ ᱟᱹᱛᱩ ᱨᱮ, ᱢᱟᱹᱡᱷᱤ, ᱯᱟᱨᱟᱱᱤᱠ, ᱱᱟᱭᱠᱮ, ᱜᱚᱰᱮᱛ, ᱡᱚᱜᱽ ᱢᱟᱹᱡᱷᱤ ᱵᱟᱵᱟ, ᱮᱢᱟᱱ ᱠᱚ ᱵᱮᱨᱮᱫ ᱠᱮᱫ ᱠᱚᱣᱟ ᱾ ᱫᱤᱞᱞᱤ ᱞᱮᱠᱟᱱ ᱱᱟᱜᱟᱨ ᱨᱮ ᱥᱟᱱᱛᱟᱞ ᱦᱚᱲ ᱢᱟᱹᱡᱷᱤ ᱟᱹᱨᱤ ᱠᱚ ᱪᱟᱹᱞᱩ ᱠᱮᱫ ᱛᱮ ᱥᱟᱱᱟᱢ ᱦᱚᱲ ᱨᱟᱹᱥᱠᱟᱹ ᱠᱚ ᱥᱚᱫᱚᱨ ᱠᱮᱫᱟ ᱾
ᱟᱹᱛᱩ ᱠᱟᱹᱢᱤᱦᱚᱨᱟ
ᱟᱹᱛᱩ ᱨᱮ, ᱟᱹᱛᱩ ᱢᱚᱬᱮ ᱦᱚᱲ ᱵᱟᱝ ᱠᱚ ᱛᱟᱦᱮᱸ ᱞᱮᱱᱠᱷᱟᱱ, ᱥᱟᱱᱛᱟᱞ ᱟᱹᱛᱩ ᱴᱚᱞᱟ ᱨᱮᱭᱟᱜ ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱦᱟᱹᱵᱤᱡ ᱛᱮ ᱡᱟᱦᱟᱸ ᱠᱚ ᱠᱟᱹᱢᱤᱦᱚᱨᱟ ᱢᱮᱱᱟᱜ ᱟᱠᱟᱫᱟ, ᱚᱱᱟ ᱠᱚ ᱠᱟᱹᱢᱤ ᱫᱚ ᱵᱟᱝ ᱞᱟᱦᱟᱜᱼᱟ ᱾ ᱚᱱᱟᱛᱮ ᱟᱹᱛᱩ ᱨᱮ ᱟᱹᱛᱩ ᱢᱚᱬᱮ ᱦᱚᱲ ᱫᱟᱭᱤᱠ ᱠᱚ ᱜᱚᱜᱼᱟᱫ ᱠᱚᱣᱟ ᱾
ᱵᱟᱰᱟᱭ ᱛᱮᱭᱟᱜ
ᱥᱟᱱᱛᱟᱲ ᱡᱟᱹᱛᱤ ᱵᱟᱥᱟ ᱰᱮᱨᱟ ᱟᱹᱛᱩ ᱨᱮ, ᱟᱹᱛᱩ ᱢᱚᱬᱮ ᱦᱚᱲ ᱴᱷᱟᱹᱣᱠᱟᱹ ᱵᱟᱝ ᱠᱚ ᱛᱟᱦᱮᱸ ᱠᱟᱱᱛᱮ, ᱟᱹᱛᱩ ᱛᱟᱦᱮᱸᱠᱟᱱ ᱨᱮᱦᱚᱸ ᱵᱤᱦᱟᱹ ᱵᱟᱯᱞᱟ ᱥᱮ ᱵᱟᱦᱟᱼᱥᱚᱨᱦᱟᱭ ᱞᱮᱠᱟᱱᱟᱜ ᱯᱚᱨᱚᱵᱽ ᱯᱚᱨᱵᱟᱥ ᱞᱟᱹᱜᱤᱫ ᱫᱚ, ᱡᱟᱱᱟᱢ ᱟᱹᱛᱩ ᱫᱤᱥᱳᱢ ᱨᱮ ᱨᱩᱣᱟᱹᱲ ᱦᱩᱭᱩᱜ ᱠᱟᱱ ᱛᱟᱠᱚ ᱛᱟᱦᱮᱸᱫ ᱾ ᱡᱟᱛᱮ ᱚᱱᱟ ᱟᱹᱛᱩ ᱨᱮᱱ ᱦᱚᱲ ᱥᱟᱱᱟᱢ ᱞᱮᱠᱟᱱ ᱠᱟᱹᱢᱤ ᱦᱚᱨᱟ, ᱟᱹᱛᱩ ᱨᱮᱜᱮ ᱠᱚ ᱛᱚᱨᱟᱣ ᱫᱟᱲᱮᱭᱟᱜᱼᱢᱟ, ᱚᱱᱟ ᱛᱮ ᱟᱹᱛᱩ ᱨᱮ ᱥᱟᱱᱟᱢ ᱞᱮᱠᱟᱱ ᱫᱟᱭᱤᱠ ᱦᱚᱲ ᱠᱚ ᱫᱚᱦᱚ ᱠᱮᱫ ᱠᱚᱣᱟ ᱾
