ᱵᱟᱡᱟᱣ ᱠᱷᱟᱹᱛᱤᱨ ᱢᱮᱪ ᱛᱟᱞᱟ ᱨᱮᱜᱮ ᱥᱟᱦᱟ ᱞᱟᱜᱟᱣ ᱠᱮᱫᱮᱭᱟ ᱵᱩᱢᱨᱟ ᱾ ᱚᱱᱟ ᱫᱷᱟᱠᱠᱟ ᱥᱟᱢᱲᱟᱣ ᱠᱟᱛᱮ ᱫᱟᱨᱩᱱ ᱠᱚ ᱠᱟᱢᱵᱮᱠ ᱟᱠᱟᱫᱟ ᱴᱤᱢ ᱤᱱᱰᱤᱭᱟ ᱾ ᱯᱮᱥᱟᱨᱟᱜ ᱫᱟᱯᱚᱴ ᱛᱮ ᱯᱳᱭᱞᱳ ᱤᱱᱤᱝᱥ ᱨᱮ ᱚᱥᱴᱨᱮᱹᱞᱤᱭᱟ ᱑᱘᱑ ᱨᱟᱱ ᱨᱮᱜᱮ ᱠᱚ ᱚᱞᱼᱟᱣᱩᱴ ᱠᱮᱫ ᱠᱚᱣᱟ ᱾ ᱞᱤᱰ ᱠᱚ ᱧᱟᱢ ᱠᱮᱫᱟ ᱔ ᱨᱟᱱ ᱨᱮᱱᱟᱜ ᱾ ᱯᱮᱭᱟ ᱠᱟᱛᱮ ᱩᱭᱠᱮᱹᱴ ᱠᱤᱱ ᱦᱟᱛᱟᱣ ᱠᱮᱫᱟ ᱢᱚᱦᱚᱢᱢᱚᱫᱽ ᱥᱤᱨᱟᱡᱽ ᱟᱨ ᱯᱨᱚᱥᱤᱫᱷ ᱠᱨᱤᱥᱱᱟ ᱾ ᱵᱟᱨᱭᱟ ᱠᱟᱛᱮ ᱩᱭᱠᱮᱹᱴ ᱠᱤᱱ ᱧᱟᱢ ᱟᱠᱟᱫᱟ ᱵᱩᱢᱨᱟ ᱟᱨ ᱱᱤᱛᱤᱥ ᱨᱮᱹᱰᱰᱤ ᱾
ᱢᱮᱱᱠᱷᱟᱱ ᱫᱚᱥᱟᱨ ᱤᱱᱤᱝᱥ ᱨᱮᱦᱚᱸ ᱵᱮᱴᱤᱝ ᱵᱤᱯᱚᱨᱡᱚᱭ ᱨᱮᱠᱚ ᱯᱟᱲᱟᱣᱮᱱᱟ ᱵᱷᱟᱨᱚᱛ ᱾ ᱨᱤᱥᱚᱵᱷ ᱯᱚᱱᱛᱷ ᱱᱟᱥᱮᱭ ᱞᱟᱹᱲᱦᱟᱹᱭ ᱞᱮᱫ ᱨᱮᱦᱚᱸ ᱟᱹᱴᱩᱼᱯᱟᱹᱴᱩ ᱠᱷᱟᱹᱛᱤᱨ ᱛᱮ ᱩᱭᱠᱮᱹᱴ ᱠᱚ ᱟᱫ ᱠᱮᱫᱟ ᱵᱟ.ᱠᱤ ᱵᱮᱴᱥᱢᱮᱱ ᱠᱚ ᱾ ᱚᱯᱷᱼᱥᱴᱟᱢᱯ ᱵᱟᱦᱨᱮ ᱨᱮᱱᱟᱜ ᱵᱚᱞ ᱜᱩᱛᱩ ᱨᱮᱱᱟᱜ ᱟᱡᱟᱨ ᱵᱟᱝ ᱥᱟᱨᱟᱣᱞᱮᱱ ᱛᱟᱭᱟ ᱠᱳᱦᱞᱤᱭᱟᱜ ᱾ ᱫᱚᱥᱟᱨ ᱢᱟᱦᱟ ᱢᱩᱪᱟᱹᱫ ᱨᱮ ᱖ ᱩᱭᱠᱮᱹᱴ ᱵᱚᱫᱚᱞᱛᱮ ᱑᱔᱑ ᱠᱚ ᱨᱟᱱ ᱟᱠᱟᱫᱟ ᱵᱷᱟᱨᱚᱛ ᱾
ᱯᱳᱭᱞᱳ ᱤᱱᱤᱝᱥ ᱨᱮ ᱑᱘᱑ ᱨᱟᱱ ᱨᱮᱠᱚ ᱚᱞ ᱟᱣᱩᱴ ᱞᱮᱱᱟ ᱚᱥᱴᱨᱮᱹᱞᱤᱭᱟ ᱾ ᱵᱮᱴᱤᱝ ᱠᱚᱨᱟᱣ ᱥᱮᱱ ᱠᱟᱛᱮ ᱵᱷᱟᱜᱮ ᱜᱮᱠᱤᱱ ᱮᱛᱚᱦᱚᱵ ᱞᱮᱫᱟ ᱵᱷᱟᱨᱚᱛ ᱨᱮᱱ ᱵᱟᱨᱭᱟ ᱳᱯᱮᱹᱱᱟᱨ ᱾ ᱢᱤᱪᱮᱞ ᱥᱴᱟᱨᱠᱟᱜ ᱯᱳᱭᱞᱳ ᱚᱵᱷᱟᱨ ᱨᱮ ᱯᱚᱱᱭᱟ ᱵᱟᱣᱩᱱᱰᱟᱨᱤ ᱫᱟᱞ ᱠᱟᱛᱮ ᱑᱖ ᱨᱟᱱᱮ ᱠᱚᱨᱟᱣ ᱡᱚᱥᱚᱥᱥᱤ ᱾ ᱔᱒ ᱨᱟᱱ ᱨᱮ ᱯᱳᱭᱞᱳ ᱩᱭᱠᱮᱹᱴ ᱧᱩᱨ ᱞᱮᱱᱟ ᱵᱷᱟᱨᱚᱛᱟᱜ ᱾ ᱑᱓ ᱨᱟᱱ ᱠᱟᱛᱮ ᱥᱠᱚᱴ ᱵᱳᱞᱮᱱᱰᱟᱜ ᱵᱚᱞ ᱨᱮᱭ ᱵᱳᱞᱰ ᱞᱮᱱᱟ ᱠᱮᱹ ᱮᱞᱹ ᱨᱟᱦᱩᱞ ᱾ ᱩᱯᱨᱩᱢ ᱨᱳᱜᱽ ᱛᱮᱜᱮᱭ ᱟᱣᱩᱴ ᱠᱳᱦᱞᱤ ᱾ ᱖ ᱨᱟᱱ ᱠᱚᱨᱟᱣ ᱠᱟᱛᱮ ᱥᱞᱤᱯ ᱨᱮᱭ ᱠᱮᱪ ᱟᱣᱩᱴ ᱾ ᱑᱓ ᱨᱟᱱ ᱨᱮ ᱥᱩᱵᱷᱢᱟᱱ ᱜᱤᱞ ᱟᱣᱩᱴ ᱠᱟᱛᱮ ᱚᱵᱷᱤᱥᱮᱹᱠ ᱴᱮᱹᱥᱴ ᱨᱮ ᱩᱭᱠᱮᱹᱴᱮ ᱦᱟᱛᱟᱣ ᱠᱮᱫᱟ ᱳᱭᱮᱵᱽᱥᱴᱟᱨ ᱾
ᱠᱷᱟᱹᱞᱤ ᱛᱤᱸᱜᱩ ᱠᱮᱴᱮᱡᱼᱮ ᱛᱟᱦᱮᱸ ᱠᱟᱱᱟ ᱨᱤᱥᱚᱵᱷ ᱯᱚᱱᱛᱷ ᱾ ᱢᱟᱨᱢᱩᱠᱷᱤ ᱵᱮᱴᱤᱝ ᱥᱴᱟᱭᱤᱞ ᱛᱮ ᱟᱣᱩᱴ ᱠᱷᱟᱹᱛᱤᱨ ᱥᱚᱢᱟᱞᱳᱪᱚᱱᱟ ᱦᱩᱭ ᱟᱠᱟᱱ ᱨᱮᱦᱚᱸ, ᱚᱱᱟ ᱥᱴᱟᱭᱤᱞ ᱛᱮᱜᱮ ᱫᱚᱞᱼᱮ ᱵᱟᱧᱪᱟᱣ ᱾ ᱤᱱᱤᱝᱥ ᱨᱮᱱᱟᱜ ᱮᱛᱚᱦᱚᱵ ᱜᱮᱭ ᱠᱚᱨᱟᱣ ᱞᱮᱫᱟ ᱖ ᱫᱟᱞ ᱠᱟᱛᱮ ᱾ ᱴᱤᱼᱴᱩᱭᱮᱱᱴᱤ ᱢᱮᱪ ᱞᱮᱠᱟᱭ ᱠᱷᱮᱹᱞ ᱠᱮᱫᱟ ᱾ ᱒᱙ ᱵᱚᱞ ᱨᱮ ᱠᱚᱨᱟᱣ ᱠᱮᱫᱟᱭ ᱦᱟᱯᱷ ᱥᱮᱧᱪᱩᱨᱤ, ᱡᱟᱦᱟᱸᱫᱚ ᱵᱷᱟᱨᱚᱛᱤᱭᱚ ᱵᱮᱴᱤᱝ ᱢᱩᱫᱽ ᱨᱮ ᱫᱚᱥᱟᱨ ᱡᱚᱛᱚᱠᱷᱚᱱ ᱞᱚᱜᱚᱱ ᱾ ᱟᱯᱱᱟᱨᱟᱜ ᱒᱘ ᱵᱚᱞ ᱨᱮ ᱦᱟᱯᱷ ᱥᱮᱧᱪᱩᱨᱤ ᱨᱮᱱᱟᱜ ᱨᱮᱠᱚᱨᱰᱮ ᱨᱟᱹᱯᱩᱫ ᱠᱮᱫᱟ ᱟᱡ ᱜᱮ ᱾ ᱓᱓ ᱵᱚᱞ ᱨᱮ ᱖᱑ ᱨᱟᱱ ᱨᱮᱱᱟᱜ ᱡᱟᱹᱨᱩᱲᱟᱱ ᱤᱱᱤᱝᱥ ᱠᱷᱮᱹᱞ ᱠᱟᱛᱮᱭ ᱟᱣᱩᱴ ᱮᱱᱟ ᱾ ᱵᱮᱥᱤ ᱜᱷᱟᱹᱲᱤᱡ ᱵᱟᱭ ᱴᱮᱠᱟᱣ ᱟᱠᱟᱱᱟ ᱱᱤᱛᱤᱥ ᱨᱮᱹᱰᱰᱤ ᱦᱚᱸ ᱾ ᱵᱳᱞᱮᱱᱰᱟᱜ ᱵᱚᱞ ᱨᱮ ᱢᱟᱨᱟᱝ ᱥᱚᱴ ᱠᱷᱮᱹᱞ ᱥᱮᱱ ᱠᱟᱛᱮᱭ ᱟᱣᱩᱴ ᱾
ᱫᱤᱱ ᱢᱩᱪᱟᱹᱫ ᱨᱮ ᱠᱨᱤᱡᱽ ᱨᱮ ᱢᱮᱱᱟᱜ ᱠᱤᱱᱟ ᱨᱚᱵᱤᱱᱫᱨᱚ ᱡᱟᱰᱮᱹᱡᱟ ᱟᱨ ᱚᱣᱟᱥᱤᱝᱴᱚᱱ ᱥᱩᱱᱫᱚᱨ ᱾ ᱵᱷᱟᱨᱚᱛᱟᱜ ᱞᱤᱰ ᱑᱔᱕ ᱨᱟᱱ ᱨᱮᱱᱟᱜ ᱾ ᱵᱷᱟᱨᱚᱛᱤᱭᱚ ᱵᱮᱴᱟᱨ ᱠᱚ ᱡᱟᱦᱟᱸ ᱞᱮᱠᱟ ᱠᱚ ᱟᱣᱩᱴᱚᱜ ᱠᱟᱱᱟ ᱛᱟᱛᱮ ᱢᱚᱱᱮ ᱦᱩᱭᱩᱜ ᱠᱟᱱᱟ ᱛᱮᱥᱟᱨ ᱢᱟᱦᱟ ᱨᱮᱜᱮ ᱠᱷᱮᱹᱞ ᱢᱩᱪᱟᱹᱫ ᱫᱟᱲᱮᱭᱟᱜᱼᱟ ᱾ ᱵᱟᱡᱟᱣ ᱠᱷᱟᱹᱛᱤᱨ ᱫᱚᱥᱟᱨ ᱤᱱᱤᱝᱥ ᱨᱮ ᱵᱟᱝᱦᱚᱸᱭ ᱧᱟᱢ ᱫᱟᱲᱮᱭᱟᱜᱼᱟ ᱾ ᱵᱟᱠᱤ ᱵᱳᱞᱟᱨ ᱠᱚ ᱵᱷᱟᱜᱮ ᱵᱟᱝᱠᱚ ᱵᱚᱞ ᱞᱮᱠᱷᱟᱱ ᱵᱮᱴᱤᱝ ᱵᱮᱨᱛᱷᱚᱛᱟ ᱨᱮᱱᱟᱜ ᱠᱩᱲᱟᱹᱭ ᱠᱚ ᱧᱟᱢᱟ ᱾
