JYOTIPRIYA MALLICK ᱺ ᱢᱚᱱᱛᱨᱤᱥᱚᱵᱷᱟ ᱨᱮᱭ ᱨᱩᱣᱟᱹᱨ ᱫᱟᱲᱮᱼᱟ ᱡᱚᱛᱤᱯᱨᱤᱭᱚ ? ᱯᱚᱨᱤᱥᱚᱫᱤᱭᱚ ᱫᱚᱞ ᱨᱮᱭᱟᱜ ᱫᱩᱯᱨᱩᱯ ᱨᱮ ᱤᱱᱜᱤᱛᱼᱮ ᱮᱢ ᱠᱮᱫᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ

JYOTIPRIYA MALLICK ᱺ ᱡᱮᱞ ᱠᱷᱚᱱ ᱢᱩᱠᱛᱤ ᱧᱟᱢ ᱠᱮᱫᱟ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ (JYOTIPRIYA MALLICK), ᱟᱨ ᱚᱱᱟ ᱛᱟᱭᱚᱢ ᱜᱮ ᱠᱟᱛᱷᱟ ᱨᱟᱠᱟᱵ ᱟᱠᱟᱱᱟ ᱡᱮ ᱡᱚᱛᱤᱯᱨᱤᱭᱚ ᱢᱚᱱᱛᱨᱤ ᱥᱚᱵᱷᱟ ᱨᱮ ᱨᱩᱣᱟᱨ ᱟᱭ ᱥᱮ ᱵᱟᱝ? ᱡᱚᱛᱤᱯᱨᱤᱭᱚ ᱡᱮᱞ ᱠᱷᱚᱱ ᱩᱰᱩᱠ ᱛᱟᱭᱚᱢ ᱜᱮ ᱚᱛᱮ ᱢᱟᱦᱟ ᱦᱤᱞᱟᱹᱜ ᱵᱤᱫᱷᱟᱱ ᱥᱚᱵᱷᱟ ᱨᱮ ᱯᱚᱨᱤᱥᱚᱫᱤᱭᱚ ᱫᱚᱞ ᱨᱮᱭᱟᱜ ᱫᱩᱯᱲᱩᱵᱼᱮ ᱦᱚᱦᱚ ᱞᱮᱫᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱮᱯᱟᱫᱫᱷᱟᱭ (MAMATA BANERJEE)᱾ ᱯᱚᱨᱤᱥᱚᱫᱤᱭᱚ ᱫᱚᱞ ᱨᱮᱭᱟᱜ ᱚᱱᱟ ᱫᱩᱯᱲᱩᱵ ᱠᱷᱚᱱ ᱜᱮ ᱡᱚᱛᱤᱯᱨᱤ ᱤᱫᱤ ᱠᱟᱛᱮᱡ ᱠᱟᱛᱷᱟᱭ ᱨᱚᱲ ᱠᱮᱫᱟ ᱢᱚᱢᱚᱛᱟ ᱵᱚᱱᱫᱮᱯᱟᱫᱫᱷᱟᱭ (MAMATA BANERJEE)᱾ ᱢᱚᱢᱚᱛᱟ ᱟᱜ ᱞᱟᱹᱭ ᱯᱨᱚᱢᱟᱱ ᱪᱷᱟᱲᱟ ᱜᱮ ᱠᱷᱟᱞᱤ ᱨᱟᱡᱽᱱᱤᱛᱤ ᱠᱷᱟᱹᱛᱤᱨ ᱜᱮ ᱩᱱᱤ ᱟᱲᱟᱹᱭ ᱥᱮᱨᱢᱟ ᱦᱟᱵᱤᱛ ᱡᱮᱞ ᱨᱮ ᱟᱴᱠᱟᱣ ᱫᱚᱦᱚ ᱦᱩᱭ ᱞᱮᱱ ᱛᱟᱦᱮᱱᱟ᱾ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ ᱵᱤᱨᱩᱫ ᱨᱮ ᱫᱩᱨᱱᱤᱛᱤ ᱨᱮᱭᱟᱜ ᱚᱠᱟ ᱯᱨᱚᱢᱟᱱ ᱵᱟᱝ ᱧᱟᱢ ᱞᱮᱱ ᱛᱮ ᱡᱮᱞ ᱠᱷᱚᱱ ᱡᱟᱢᱤᱱ ᱮ ᱧᱟᱢ ᱠᱮᱫᱟ ᱵᱟᱞᱩ᱿
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱛᱨᱤᱱᱚᱢᱩᱞ ᱵᱟᱝᱞᱟ ᱨᱮ ᱠᱷᱚᱢᱚᱛᱟ ᱨᱮ ᱦᱮᱡ ᱠᱷᱚᱱ ᱜᱮ ᱫᱚᱞ ᱨᱮᱱ ᱢᱟᱨᱟᱝ ᱟᱜᱩᱭᱟᱹᱱᱮ ᱛᱟᱦᱮᱸ ᱠᱟᱱᱟ ᱡᱚᱛᱤᱯᱨᱤᱚ ᱢᱚᱞᱞᱤᱠ (JYOTIPRIYA MALLICK)᱾ ᱢᱤᱫ ᱥᱚᱢᱚᱭ ᱩᱛᱛᱚᱨ ᱒᱔ ᱯᱚᱨᱜᱚᱱᱟ ᱡᱮᱞᱞᱟ ᱨᱮᱱ ᱛᱨᱤᱱᱚᱢᱩᱞ ᱫᱚᱞ ᱨᱮᱱ ᱡᱮᱞᱞᱟ ᱥᱚᱵᱷᱟᱯᱚᱛᱤ ᱥᱟᱣ ᱥᱟᱣᱛᱮ ᱯᱚᱱᱚᱛ ᱨᱮᱱ ᱢᱚᱱᱛᱨᱤ ᱦᱚᱭ ᱛᱟᱦᱮᱸ ᱠᱟᱱᱟ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ(JYOTIPRIYA MALLICK)᱾ ᱒᱐᱒᱑ ᱥᱟᱹᱷᱤᱛ ᱨᱮ ᱯᱷᱳᱨᱮᱥᱴ ᱢᱤᱱᱤᱥᱴᱮᱨ ᱥᱟᱣ ᱛᱮ ᱢᱚᱱᱛᱨᱤ ᱥᱚᱵᱷᱟ ᱨᱮ ᱜᱩᱨᱩᱛᱛᱚᱯᱩᱨᱱᱚ ᱢᱮᱢᱵᱟᱨ ᱦᱚᱭ ᱛᱟᱦᱮᱸ ᱠᱟᱱᱟ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ (JYOTIPRIYA MALLICK)᱿ ᱚᱱᱟ ᱫᱟᱭᱵᱷᱟᱨ ᱨᱮ ᱛᱟᱦᱮᱱ ᱛᱩᱞᱩᱡ GI ᱤᱰᱤ (ENFORCEMENT DIRECTORATE) ᱩᱱᱤ ᱮᱨᱮᱥᱴ ᱛᱟᱭᱚᱢ ᱦᱚᱸ ᱵᱮᱥ ᱠᱤᱪᱷᱩ ᱫᱤᱱ ᱦᱟᱵᱤᱛ ᱛᱮ ᱢᱚᱱᱛᱨᱤ ᱥᱚᱵᱷᱟ ᱨᱮᱜᱤ ᱛᱟᱦᱮᱸ ᱠᱟᱱᱟ ᱵᱟᱞᱩ᱾ ᱢᱮᱱᱠᱷᱟᱱ ᱢᱩᱪᱷᱟᱹᱫ ᱦᱟᱵᱤᱛ ᱛᱮ ᱡᱚᱛᱤᱯᱨᱤᱭᱚ ᱢᱚᱱᱛᱨᱤ ᱥᱚᱵᱷᱟ ᱠᱷᱚᱱ ᱚᱪᱚᱜ ᱠᱟᱛᱮᱡ ᱚᱱᱟ ᱫᱟᱭᱵᱷᱟᱨ ᱧᱟᱢ ᱠᱮᱫᱟᱭ ᱵᱤᱨᱵᱟᱦᱟ ᱦᱟᱱᱥᱫᱟ (BIRBAHA HANSDA)᱾
ᱨᱮᱥᱚᱱ ᱫᱩᱨᱱᱤᱛᱤ ᱢᱟᱢᱞᱟ ᱨᱮ (ENFORCEMENT DIRECTORATE) ᱒᱐᱒᱓ ᱥᱟᱹᱦᱤᱫ ᱨᱮᱭᱟᱜ ᱒᱗ ᱚᱠᱴᱚᱵᱚᱨ ᱜᱨᱮᱯᱛᱟᱨ ᱞᱮᱫᱤᱭᱟ ᱠᱚ ᱡᱚᱛᱤᱯᱨᱤᱭᱚ᱾ ᱑᱔ ᱪᱟᱸᱫᱩ ᱡᱮᱞ ᱨᱮ ᱛᱟᱦᱮᱸ ᱛᱟᱭᱚᱢ ᱒᱐᱒᱕ ᱨᱮᱭᱟᱜ ᱑᱕ ᱡᱟᱱᱩᱟᱨᱤ ᱤᱰᱤ ᱟᱫᱟᱞᱚᱛ ᱟᱜ ᱱᱤᱨᱫᱮᱥ ᱛᱮ ᱡᱟᱢᱤᱱ ᱧᱟᱢ ᱞᱮᱫᱟᱭ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ ᱾ ᱕᱐ ᱞᱟᱠ ᱴᱟᱠᱟ ᱨᱮᱭᱟᱜ ᱵᱮᱠᱛᱤᱜᱚᱛᱚ ᱵᱚᱱᱰ ᱟᱨ ᱒᱕ ᱦᱟᱡᱟᱨ ᱴᱟᱠᱟ ᱨᱮᱭᱟᱜ ᱵᱟᱨᱭᱟ ᱵᱚᱱᱰ ᱨᱮ ᱠᱤᱪᱷᱩ ᱥᱚᱨᱛᱚ ᱟᱛᱮ ᱡᱟᱢᱤᱱ ᱦᱩᱭ ᱟᱠᱟᱱᱟ ᱵᱟᱞᱩ ᱟᱜ᱾ ᱟᱨ ᱱᱤᱛ ᱡᱚᱛᱤᱯᱨᱤᱭᱚ ᱢᱚᱞᱞᱤᱠ ᱡᱮᱞ ᱠᱷᱚᱱ ᱩᱰᱩᱠ ᱛᱟᱭᱚᱢ ᱜᱮ ᱱᱟᱣᱟ ᱛᱮ ᱪᱟᱨᱪᱟ ᱨᱟᱠᱟᱵ ᱟᱠᱟᱱᱟ ᱢᱚᱱᱛᱨᱤ ᱥᱚᱵᱷᱟ ᱨᱮ ᱠᱟᱢᱵᱮᱠ ᱤᱫᱤ ᱠᱟᱛᱮᱡ᱾ ᱛᱚᱵᱮ ᱡᱮᱞ ᱠᱷᱚᱱ ᱵᱮᱞ ᱧᱟᱢ ᱛᱟᱭᱚᱢ ᱜᱮ ᱵᱟᱞᱩ ᱤᱫᱤ ᱠᱟᱛᱮᱡ ᱥᱟᱨᱦᱟᱣ ᱟᱱᱟᱝ ᱠᱟᱛᱷᱟᱭ ᱨᱚᱲ ᱟᱠᱟᱫᱟ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱮᱯᱟᱫᱫᱷᱟᱭ᱾