ᱴᱨᱟᱭᱤᱵᱽ ᱴᱤᱵᱷᱤ ᱥᱟᱱᱛᱟᱲᱤ ᱰᱤᱡᱤᱴᱟᱞᱺ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱥᱟᱱᱼᱟᱜ (Shaan) ᱚᱲᱟᱜ ᱨᱮ ᱵᱚᱛᱚᱨᱟᱱ ᱥᱮᱸᱜᱮᱞ ᱾ ᱵᱟᱰᱟᱭ ᱧᱟᱢᱟᱠᱟᱱᱟ ᱜᱷᱟᱹᱞ ᱟᱠᱟᱱᱟᱭ ᱢᱤᱫ ᱦᱚᱲ ᱾ ᱢᱮᱱᱠᱷᱟᱱ ᱟᱫᱷᱟᱼᱧᱤᱫᱟᱹ ᱪᱮᱠᱟᱛᱮ ᱩᱱᱟᱹᱜ ᱢᱟᱨᱟᱝ ᱜᱷᱚᱴᱟᱣᱮᱱᱟ ? ᱡᱟᱦᱟᱸ ᱯᱷᱞᱮᱴ ᱨᱮ ᱥᱮᱸᱜᱮᱞ ᱡᱩᱞ ᱞᱮᱱᱟ, ᱚᱱᱟ ᱞᱟᱛᱟᱨ ᱨᱮᱜᱮ ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱥᱟᱱᱼᱟᱜ ᱚᱲᱟᱜ ᱾ ᱥᱮᱸᱜᱮᱞ ᱡᱩᱞ ᱵᱟᱵᱚᱫᱽ ᱯᱳᱭᱞᱳ ᱨᱮ ᱥᱟᱱ ᱯᱟᱦᱴᱟ ᱠᱷᱚᱱ ᱡᱟᱦᱟᱱ ᱚᱯᱷᱤᱥᱤᱭᱟᱞ ᱨᱤᱭᱮᱠᱥᱚᱱ ᱵᱟᱝ ᱧᱟᱢ ᱟᱠᱟᱱᱟ ᱾ ᱮᱴᱟᱜ ᱥᱮᱫ ᱱᱚᱣᱟ ᱜᱷᱚᱴᱚᱱ ᱥᱟᱢᱟᱝ ᱨᱮ ᱦᱮᱡ ᱥᱟᱶᱛᱮ ᱪᱟᱹᱲᱤᱭᱟᱹᱠᱚᱱ ᱟᱹᱣᱟᱹᱭ ᱟᱠᱟᱱᱟ ᱾ ᱵᱤᱥᱮᱹᱥ ᱠᱚᱨᱮ ᱥᱟᱱ ᱨᱮᱱ ᱯᱷᱮᱱ ᱠᱚ ᱱᱚᱣᱟ ᱵᱟᱵᱚᱫᱽ ᱵᱷᱟᱵᱽᱱᱟ ᱨᱮ ᱢᱮᱱᱟᱜ ᱠᱚᱣᱟ ᱾ ᱢᱮᱱᱠᱷᱟᱱ ᱢᱩᱪᱟᱹᱫ ᱦᱟᱹᱵᱤᱡ ᱱᱚᱣᱟ ᱵᱟᱵᱚᱫᱽ ᱨᱚᱲ ᱠᱮᱫᱟᱭ ᱥᱟᱱ ᱾
ᱮᱭᱟᱭ ᱛᱟᱞᱟ ᱨᱮ ᱥᱮᱸᱜᱮᱞ (Shaan)
ᱥᱮᱨᱮᱧ ᱥᱤᱠᱟᱹᱨᱤᱭᱟᱹ ᱥᱟᱱ (Shaan) ᱡᱟᱦᱟᱸ ᱯᱷᱞᱮᱴ ᱨᱮᱭ ᱛᱟᱦᱮᱱᱟ, ᱚᱱᱟᱫᱚ ᱵᱟᱱᱫᱨᱟ ᱚᱭᱮᱹᱥᱴ ᱮᱞᱟᱠᱟ ᱨᱮ ᱾ ᱵᱟᱰᱟᱭ ᱧᱟᱢ ᱟᱠᱟᱱᱟ ᱧᱤᱫᱟᱹ ᱯᱳᱣᱱᱮ ᱵᱟᱨ ᱵᱟᱡᱟᱜ ᱚᱠᱛᱚ ᱟᱪᱠᱟ ᱜᱮ ᱯᱷᱟᱭᱟᱨ ᱵᱨᱤᱜᱮᱹᱰ ᱨᱮ ᱠᱷᱚᱵᱚᱨ ᱥᱮᱱ ᱞᱮᱱᱟ, ᱡᱮ ᱚᱱᱟ ᱯᱷᱞᱮᱴ ᱨᱮ ᱥᱮᱸᱜᱮᱞ ᱡᱳᱞ ᱟᱠᱟᱱᱟ ᱾ ᱚᱱᱟ ᱛᱟᱭᱚᱢ ᱟᱹᱰᱤ ᱞᱚᱜᱚᱱ ᱜᱮ ᱥᱮᱴᱮᱨᱟᱠᱟᱱᱟ ᱯᱷᱟᱭᱟᱨ ᱵᱨᱤᱜᱮᱹᱰ ᱨᱮᱱᱟᱜ ᱜᱮᱞ ᱜᱚᱴᱟᱝ ᱤᱧᱡᱤᱱ ᱾ ᱯᱷᱟᱭᱟᱨ ᱵᱨᱤᱜᱮᱹᱰ ᱟᱨ ᱰᱤᱡᱟᱥᱴᱟᱨ ᱢᱮᱱᱮᱡᱽᱢᱮᱱᱴ ᱨᱮᱱ ᱢᱟᱲᱛᱮᱹ ᱠᱚ ᱥᱮᱱ ᱠᱟᱛᱮ ᱠᱚ ᱧᱮᱞ ᱯᱷᱞᱮᱴ ᱨᱮᱱᱟᱜ ᱮᱭᱟᱭ ᱛᱟᱞᱟ ᱠᱷᱚᱱ ᱫᱷᱩᱣᱟᱹ ᱚᱰᱳᱠᱚᱜ ᱠᱟᱱᱟ ᱾ ᱮᱢᱚᱱᱪᱮᱫ ᱧᱮᱞ ᱟᱠᱟᱱᱟ ᱥᱮᱸᱜᱮᱞ ᱡᱳᱞ ᱦᱚᱸ ᱾
ᱜᱩᱨ ᱨᱮᱱᱟᱜ ᱡᱟᱦᱟᱱ ᱠᱷᱚᱵᱚᱨ ᱵᱟᱝ ᱧᱟᱢᱟᱠᱟᱱᱟ
ᱞᱚᱜᱚᱱ ᱜᱮ ᱩᱫᱽᱫᱷᱟᱹᱨ ᱠᱟᱹᱢᱤ ᱨᱮᱠᱚ ᱟᱲᱜᱳᱣᱟᱠᱟᱱᱟ ᱵᱟᱨᱭᱟ ᱴᱤᱢ ᱾ ᱩᱫᱽᱫᱷᱟᱹᱨ ᱦᱩᱭ ᱟᱠᱟᱱᱟ ᱢᱤᱫᱴᱮᱱ ᱦᱟᱲᱟᱢ ᱦᱚᱲ ᱾ ᱱᱚᱣᱟ ᱜᱷᱚᱴᱚᱱ ᱨᱮ ᱢᱤᱫᱴᱮᱱ ᱘᱐ ᱥᱮᱨᱢᱟ ᱩᱢᱮᱹᱨ ᱨᱮᱱ ᱢᱤᱫ ᱵᱩᱲᱦᱤᱭᱟᱜ ᱦᱚᱲᱢᱚ ᱵᱟᱹᱲᱤᱡ ᱟᱠᱟᱱ ᱛᱟᱭᱟ ᱾ ᱩᱱᱤ ᱞᱚᱜᱚᱱ ᱢᱟᱪᱷᱟ ᱛᱤᱠᱪᱷᱟᱹ ᱞᱟᱹᱜᱤᱫ ᱛᱮ ᱮᱢᱵᱩᱞᱮᱱᱥ ᱛᱮᱠᱚ ᱤᱫᱤ ᱥᱩᱯᱩᱨ ᱢᱤᱫᱴᱮᱱ ᱵᱮᱹᱥᱚᱨᱠᱟᱨᱤ ᱦᱟᱥᱯᱟᱛᱟᱞ ᱨᱮ ᱾ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱩᱱᱤ ᱵᱩᱲᱦᱤ ᱦᱚᱲ ᱟᱭ.ᱥᱤ.ᱤᱭᱩ ᱨᱮᱠᱚ ᱫᱚᱦᱚᱣᱟᱠᱟᱫᱮᱭᱟ ᱾ ᱡᱩᱫᱤᱭᱳ ᱱᱚᱣᱟ ᱜᱷᱚᱴᱚᱱ ᱨᱮ ᱜᱚᱡᱼᱜᱩᱨ ᱨᱮᱱᱟᱜ ᱡᱟᱦᱟᱱ ᱠᱷᱚᱵᱚᱨ ᱵᱟᱝ ᱧᱟᱢ ᱟᱠᱟᱱᱟ ᱾
ᱢᱩᱢᱵᱟᱭ ᱨᱮ ᱵᱟᱨᱵᱟᱨ ᱥᱮᱸᱜᱮᱞ ᱡᱳᱞ ᱨᱮᱱᱟᱜ ᱜᱷᱚᱴᱚᱱ
ᱢᱮᱱᱠᱷᱟᱱ ᱥᱮᱸᱜᱮᱞ ᱪᱮᱠᱟᱛᱮ ᱫᱷᱚᱨᱟᱣᱮᱱᱟ ? ᱱᱚᱣᱟ ᱠᱩᱠᱞᱤ ᱜᱮ ᱜᱷᱩᱨᱞᱟᱹᱜ ᱠᱟᱱᱟ ᱾ ᱯᱷᱟᱭᱟᱨ ᱵᱨᱤᱜᱮᱹᱰ ᱨᱮᱱ ᱠᱟᱹᱢᱤᱭᱟᱹ ᱠᱚᱣᱟᱜ ᱟᱭᱼᱩᱢᱟᱹᱱ, ᱱᱚᱣᱟ ᱜᱷᱚᱴᱚᱱ ᱜᱷᱚᱴᱟᱣᱟᱠᱟᱱᱟ ᱥᱚᱨᱴᱼᱥᱟᱨᱠᱤᱴ ᱠᱷᱚᱱᱟᱜ ᱾ ᱦᱟᱞᱮᱜᱮ ᱢᱩᱢᱵᱟᱭ ᱨᱮᱱᱟᱜ ᱟᱭᱢᱟ ᱡᱟᱭᱜᱟ ᱨᱮ ᱥᱮᱸᱜᱮᱞ ᱡᱳᱞ ᱨᱮᱱᱟᱜ ᱜᱷᱚᱴᱚᱱ ᱜᱷᱚᱴᱟᱣᱟᱠᱟᱱᱟ ᱾ ᱪᱟᱞᱟᱣᱮᱱ ᱚᱛᱮ ᱢᱟᱦᱟ ᱢᱟᱸᱡᱟᱱ ᱥᱮᱸᱜᱮᱞ ᱫᱷᱚᱨᱟᱣ ᱞᱮᱱᱟ ᱢᱩᱢᱵᱟᱭ ᱨᱮᱱᱟᱜ ᱠᱩᱨᱞᱟ ᱥᱠᱨᱮᱯ ᱢᱟᱨᱠᱮᱹᱴ ᱨᱮ ᱾ ᱜᱚᱡᱼᱜᱩᱨ ᱨᱮᱱᱟᱜ ᱡᱟᱦᱟᱱ ᱠᱷᱚᱵᱚᱨ ᱵᱟᱝ ᱦᱩᱭᱟᱠᱟᱱ ᱨᱮᱦᱚᱸ ᱓᱐ ᱠᱷᱚᱱ ᱔᱐ ᱜᱚᱴᱟᱝ ᱚᱭᱮᱨᱼᱦᱟᱣᱩᱥ ᱨᱟᱯᱟᱜ ᱨᱚᱸᱜᱚᱣᱟᱠᱟᱱᱟ ᱾ ᱢᱟᱱᱠᱷᱩᱨᱫᱽ ᱵᱚᱥᱛᱤ ᱮᱞᱟᱠᱟ ᱨᱮᱦᱚᱸ ᱥᱮᱸᱜᱮᱞ ᱫᱷᱚᱨᱟᱣ ᱞᱮᱱᱟ ᱾ ᱯᱟᱨᱚᱢᱮᱱ ᱒᱗ ᱱᱚᱵᱷᱮᱹᱢᱵᱚᱨ ᱢᱩᱢᱵᱟᱭ ᱨᱮᱱᱟᱜ ᱢᱤᱫ ᱯᱷᱞᱮᱴ ᱨᱮ ᱥᱮᱸᱜᱮᱞ ᱫᱷᱚᱨᱟᱣ ᱞᱮᱱᱟ, ᱡᱟᱦᱟᱸ ᱜᱷᱚᱴᱚᱱ ᱨᱮ ᱯᱷᱞᱮᱴ ᱨᱮ ᱛᱟᱦᱮᱱ ᱯᱮ ᱦᱚᱲ ᱥᱟᱶ ᱢᱤᱫ ᱛᱤᱨᱞᱟᱹ ᱯᱷᱟᱭᱟᱨ ᱵᱨᱤᱜᱮᱹᱰ ᱠᱟᱹᱢᱤᱭᱟᱹ ᱦᱚᱸᱭ ᱜᱷᱟᱹᱞ ᱟᱠᱟᱱᱟ ᱾
ᱵᱷᱟᱵᱽᱱᱟ ᱨᱮ ᱥᱟᱱ ᱨᱮᱱ ᱯᱷᱮᱱ ᱠᱚ
ᱵᱟᱰᱟᱭ ᱡᱚᱝ ᱞᱟᱹᱜᱽ ᱠᱟᱱᱟ ᱥᱟᱱ ᱡᱟᱦᱟᱸ ᱯᱷᱞᱮᱴ ᱨᱮᱭ ᱛᱟᱦᱮᱱ ᱛᱟᱦᱮᱸᱫ ᱚᱸᱰᱮ ᱪᱮᱠᱟᱛᱮ ᱥᱮᱸᱜᱮᱞ ᱫᱷᱚᱨᱟᱣᱮᱱᱟ ᱚᱱᱟ ᱨᱮᱱᱟᱜ ᱛᱮᱞᱟ ᱱᱤᱛᱦᱚᱸ ᱵᱟᱝ ᱧᱟᱢ ᱟᱠᱟᱱᱟ ᱾ ᱛᱚᱵᱮ ᱱᱚᱣᱟ ᱜᱷᱚᱴᱚᱱ ᱨᱮ ᱥᱟᱱ ᱨᱮᱱ ᱯᱷᱮᱱ ᱠᱚ ᱵᱷᱟᱵᱽᱱᱟ ᱨᱮᱠᱚ ᱯᱟᱲᱟᱣᱟᱠᱟᱱᱟ ᱾ ᱦᱟᱞᱚᱛ ᱥᱟᱢᱲᱟᱣ ᱛᱟᱭᱚᱢ ᱱᱟᱥᱮ ᱠᱚ ᱥᱟᱸᱦᱮᱫ ᱟᱠᱟᱫᱟ ᱾
ᱥᱟᱱᱼᱟᱜ ᱞᱟᱹᱭ
ᱥᱮᱨᱮᱧ ᱥᱤᱠᱟᱹᱨᱤᱭᱟ ᱞᱟᱹᱭ ᱟᱠᱟᱫᱟᱭ ᱪᱮᱠᱟ ᱞᱮᱠᱟᱛᱮ ᱟᱡ ᱟᱨ ᱟᱡ ᱨᱮᱱ ᱚᱲᱟᱜ ᱮᱨᱟ ᱨᱟᱫᱷᱤᱠᱟ ᱢᱩᱠᱷᱟᱨᱡᱤ, ᱦᱚᱯᱚᱱᱛᱮᱫ ᱥᱳᱦᱚᱢ ᱟᱨ ᱢᱟᱦᱤ ᱥᱮᱸᱜᱮᱞ ᱠᱷᱚᱱ ᱨᱤᱦᱟᱹᱭ ᱠᱚ ᱧᱟᱢ ᱟᱠᱟᱫᱟ ᱾ ᱞᱟᱹᱭ ᱠᱮᱫᱟᱭ, “ᱟᱯᱮ ᱥᱟᱱᱟᱢ ᱠᱚᱧ ᱵᱟᱰᱟᱭ ᱦᱚᱪᱚᱭᱮᱫ ᱯᱮᱭᱟ ᱡᱮ, ᱱᱟᱯᱟᱭ ᱢᱮᱱᱟᱜ ᱞᱮᱭᱟ, ᱥᱮᱸᱜᱮᱞ ᱗ ᱛᱟᱞᱟ ᱨᱮ ᱫᱷᱚᱨᱟᱣ ᱞᱮᱱᱟ ᱾ ᱟᱞᱮ ᱪᱮᱛᱟᱱ ᱛᱟᱞᱟ ᱨᱮᱞᱮ ᱛᱟᱦᱮᱱᱟ ᱾ ᱟᱞᱮ ᱑᱕ ᱛᱟᱞᱟ ᱞᱮ ᱫᱟᱹᱲ ᱫᱟᱲᱮᱭᱟᱜ ᱛᱟᱦᱮᱸᱫ ᱟᱨ ᱩᱫᱽᱫᱷᱟᱹᱨ ᱞᱟᱹᱜᱤᱫ ᱞᱮ ᱛᱟᱺᱜᱤᱭᱮᱫ ᱛᱟᱦᱮᱸᱫ ᱾ ᱱᱤᱭᱟᱹ ᱟᱹᱰᱤ ᱢᱟᱨᱟᱝ ᱜᱚᱞᱯᱚ ᱦᱩᱰᱤᱧ ᱢᱟᱪᱷᱟ ᱛᱮ ᱞᱟᱹᱭ ᱞᱮᱠᱷᱟᱱ ᱟᱞᱮ ᱮᱠᱮᱵᱟᱨᱮ ᱴᱷᱤᱠ ᱢᱮᱱᱟᱜ ᱞᱮᱭᱟ ᱾ ᱯᱷᱟᱭᱟᱨ ᱵᱨᱤᱜᱮᱹᱰ ᱠᱷᱚᱱ ᱱᱟᱯᱟᱭ ᱵᱮᱣᱨᱟ ᱦᱮᱡ ᱞᱮᱱᱠᱷᱟᱱ ᱜᱮ ᱟᱞᱮ ᱱᱤᱡᱮᱨᱟᱜ ᱯᱷᱞᱮᱴ ᱨᱮ ᱨᱩᱣᱟᱹᱲᱚᱜ ᱨᱮᱱᱟᱜ ᱛᱟᱺᱜᱤ ᱨᱮ ᱢᱮᱱᱟᱜ ᱞᱮᱭᱟ ᱾”
