(PAPUL MURMU) GUJARAT, Tata-Airbus aircraft facility in Vadodara : ᱜᱩᱡᱽᱨᱟᱴ ᱨᱮ ᱮᱛᱚᱦᱚᱵ ᱮᱱᱟ ᱴᱟᱴᱟᱣᱟᱜ ᱱᱟᱣᱟ ᱠᱟᱨᱠᱷᱟᱱᱟ, ᱡᱟᱦᱟᱸ ᱨᱮ ᱵᱮᱱᱟᱣᱟ ᱩᱰᱟᱹᱱ ᱜᱟᱹᱰᱤ ᱾ ᱥᱯᱮᱹᱱ ᱨᱮᱱ ᱯᱨᱮᱹᱥᱤᱰᱮᱱᱴ ᱯᱮᱫᱽᱨᱚ ᱥᱟᱶᱛᱮ ᱜᱩᱡᱽᱨᱟᱴ ᱨᱮᱭᱟᱜ ᱱᱟᱣᱟ ᱠᱟᱨᱠᱷᱟᱱᱟᱭ ᱩᱰᱷᱟᱹᱣ ᱠᱮᱫᱟᱭ ᱯᱨᱚᱫᱷᱟᱱ ᱢᱚᱱᱛᱨᱤ ᱱᱚᱨᱮᱱᱫᱨᱚ ᱢᱳᱫᱤ ᱾ ᱱᱟᱣᱟ ᱠᱟᱨᱠᱷᱟᱱᱟ ‘ᱴᱟᱴᱟ ᱮᱭᱟᱨᱯᱳᱨᱴ ᱠᱚᱢᱯᱞᱮᱹᱠᱥ’ ᱨᱮ ᱵᱮᱱᱟᱣᱟ ᱥᱤᱼ295 ᱵᱤᱢᱟᱱ ᱾ ᱵᱟᱞᱮ ᱢᱟᱦᱟ ᱨᱮ ᱜᱩᱡᱽᱨᱟᱴ ᱨᱮᱭᱟᱜ ᱵᱟᱨᱚᱫᱟ ᱠᱷᱚᱱ ᱩᱰᱷᱟᱹᱣ ᱛᱟᱭᱚᱢ ᱢᱳᱫᱤᱣᱟᱜ ᱞᱟᱹᱭ ᱱᱚᱸᱰᱮ ᱡᱟᱦᱟᱸ ᱥᱤ ᱒᱙᱕ ᱢᱚᱰᱮᱹᱞ ᱨᱮᱭᱟᱜ ᱩᱰᱟᱹᱱ ᱜᱟᱹᱰᱤ ᱛᱮᱭᱟᱨ ᱦᱩᱭᱩᱜᱼᱟ, ᱚᱱᱟ ᱦᱟᱯᱮᱱ ᱫᱤᱱ ᱨᱮ ᱵᱟᱦᱟᱨᱮ ᱫᱤᱥᱚᱢ ᱠᱚᱨᱮ ᱨᱚᱯᱛᱟᱱᱤ ᱦᱚᱸ ᱠᱚᱨᱟᱣ ᱦᱩᱭᱩᱜᱼᱟ ᱾ ᱴᱟᱴᱟ ᱥᱟᱞᱟᱜ ᱢᱮᱥᱟ ᱠᱟᱛᱮᱫ ᱩᱰᱟᱹᱱ ᱜᱟᱹᱰᱤ ᱵᱮᱱᱟᱣ ᱞᱮᱠᱷᱟᱱ ᱦᱟᱯᱮᱱ ᱫᱤᱱ ᱨᱮ ᱵᱷᱟᱨᱚᱛ ᱥᱟᱞᱟᱜ ᱥᱯᱮᱹᱱ ᱨᱮᱭᱟᱜ ᱥᱟᱹᱜᱟᱹᱭ ᱟᱨᱦᱚᱸ ᱠᱮᱴᱮᱡᱚᱜᱼᱟ ᱾ ᱛᱚᱵᱮ ᱩᱰᱷᱟᱹᱣ ᱥᱟᱹᱜᱩᱱ ᱚᱠᱛᱮ ᱨᱮ ᱯᱨᱚᱫᱷᱟᱱ ᱢᱚᱱᱛᱨᱤ ᱢᱳᱫᱤ ᱴᱟᱴᱟ ᱥᱚᱱᱥ ᱨᱮᱱ ᱢᱟᱨᱮ ᱪᱮᱭᱟᱨᱢᱮᱱ ᱵᱚᱸᱜᱟ ᱛᱟᱞᱟ ᱟᱠᱟᱱ ᱨᱚᱛᱚᱱ ᱴᱟᱴᱟ ᱧᱩᱢ ᱦᱟᱞᱟᱝ ᱠᱟᱛᱮᱫ ᱢᱟᱹᱱ ᱦᱚᱭ ᱪᱟᱞ ᱟᱫᱮᱭᱟ᱾ ᱜᱩᱡᱽᱨᱟᱴ ᱨᱮ ᱴᱟᱴᱟᱣᱟᱜ ᱱᱟᱣᱟ ᱠᱟᱨᱠᱷᱟᱱ ᱩᱰᱷᱟᱹᱣ ᱨᱮ ᱥᱮᱴᱮᱨᱮ ᱛᱟᱦᱮᱸ ᱠᱟᱱᱟ ᱴᱟᱴᱟ ᱜᱳᱥᱴᱷᱤ ᱨᱮᱱ ᱱᱟᱣᱟ ᱪᱮᱭᱟᱨᱢᱮᱱ ᱪᱚᱱᱫᱨᱚᱥᱮᱹᱠᱨᱚᱱ ᱦᱚᱸ᱾ ᱱᱟᱣᱟ ᱠᱟᱨᱠᱷᱟᱱᱟ ᱩᱰᱷᱟᱹᱣ ᱛᱟᱭᱚᱢ ᱥᱯᱮᱹᱱ ᱨᱮᱱ ᱨᱟᱥᱴᱨᱚᱯᱚᱛᱤᱣᱟᱜ ᱞᱟᱹᱭ ᱱᱚᱣᱟ ᱯᱨᱚᱠᱚᱞᱯᱚ ᱨᱮᱭᱟᱜ ᱠᱟᱹᱢᱤᱦᱚᱨᱟ ᱮᱛᱚᱦᱚᱵ ᱞᱮᱱ ᱠᱷᱟᱱ ᱵᱟᱱᱟᱨ ᱫᱤᱥᱚᱢ ᱢᱩᱫᱽ ᱨᱮ ᱥᱤᱞᱯᱚ ᱤᱫᱤ ᱠᱟᱛᱮᱫ ᱱᱟᱯᱟᱭ ᱥᱟᱹᱜᱟᱹᱭ ᱵᱮᱱᱟᱜᱼᱟ, ᱟᱨ ᱥᱟᱣᱼᱥᱟᱶᱛᱮ ᱵᱷᱟᱨᱚᱛ ᱨᱮ ᱤᱭᱳᱨᱳᱯᱤᱭᱟᱱ ᱠᱟᱱᱴᱨᱤ ᱨᱮᱭᱟᱜ ᱫᱤᱥᱚᱢ ᱠᱚᱨᱮ ᱠᱷᱚᱱ ᱦᱚᱸ ᱤᱱᱵᱷᱮᱹᱥᱴᱟᱨ ᱠᱚ ᱞᱟᱹᱜᱤᱫ ᱦᱤᱡᱩᱜ ᱨᱮᱭᱟᱜ ᱰᱟᱦᱟᱨ ᱠᱷᱩᱞᱟᱹᱜᱼᱟ᱾ ᱫᱟᱨᱟᱭ ᱠᱟᱱ ᱫᱤᱱ ᱨᱮ ᱜᱩᱡᱽᱨᱟᱴ ᱨᱮᱭᱟᱜ ᱵᱤᱢᱟᱱ ᱠᱟᱨᱠᱷᱟᱱᱟ ᱜᱮ ᱦᱩᱭᱩᱜᱼᱟ ᱫᱤᱥᱚᱢ ᱨᱮᱭᱟᱜ ᱥᱤᱞᱯᱚ ᱯᱨᱚᱛᱤᱠ ᱟᱨ ᱚᱱᱟ ᱜᱮ ᱦᱩᱭᱩᱜᱼᱟ ᱵᱷᱟᱨᱚᱛ ᱨᱮᱭᱟᱜ ᱠᱟᱹᱣᱰᱤ ᱟᱨᱡᱟᱣ ᱨᱮᱭᱟᱜ ᱢᱟᱨᱟᱝ ᱰᱟᱦᱟᱨ ᱾
ᱯᱟᱨᱚᱢᱮᱱ ᱥᱮᱨᱢᱟ ᱨᱮᱜᱮ ᱵᱷᱟᱨᱚᱛᱤᱭᱚ ᱵᱟᱭᱩᱥᱮᱱᱟ ᱧᱟᱢ ᱟᱠᱟᱫᱟᱠᱚ ᱥᱤ ᱒᱙᱕ ᱵᱤᱢᱟᱱ ᱾ ᱡᱟᱦᱟᱸ ᱫᱚ ᱒᱐᱒᱓ ᱥᱟᱞ ᱑᱓ ᱥᱮᱹᱯᱴᱮᱹᱢᱵᱚᱨ ᱨᱮ ᱥᱯᱮᱹᱱ ᱨᱮᱭᱟᱜ ᱵᱤᱢᱟᱱ ᱵᱮᱱᱟᱣ ᱠᱟᱨᱠᱷᱟᱱᱟ ” ᱮᱭᱟᱨᱵᱟᱥ ᱰᱤᱯᱷᱮᱱᱥ ᱮᱱᱰ ᱥᱯᱮᱹᱥ ᱜᱮ ᱥᱤ ᱒᱙᱕ ᱵᱤᱢᱟᱱ ᱫᱚ ᱵᱷᱟᱨᱚᱛ ᱨᱮᱱ ᱵᱟᱭᱩᱥᱮᱱᱟ ᱠᱚᱭ ᱪᱟᱞᱟᱜ ᱠᱚ ᱛᱟᱦᱮᱱᱟ ᱾ ᱚᱱᱟ ᱛᱟᱭᱚᱢ ᱒᱐ ᱥᱮᱹᱯᱴᱮᱹᱢᱵᱚᱨ ᱜᱩᱡᱽᱨᱟᱴ ᱨᱮᱭᱟᱜ ᱵᱟᱨᱚᱫᱟ ᱨᱮ ᱢᱮᱱᱟᱜ ᱵᱤᱢᱟᱱᱜᱷᱟᱴᱤ ᱨᱮ ᱯᱩᱭᱞᱩ ᱥᱤ ᱒᱙᱕ ᱵᱤᱢᱟᱱ ᱫᱚ ᱥᱮᱴᱮᱨ ᱞᱮᱱ ᱛᱟᱦᱮᱱᱟ ᱾ ᱩᱱ ᱚᱠᱛᱚ ᱜᱮ ᱵᱤᱢᱟᱱ ᱱᱤᱨᱢᱟᱱ ᱥᱚᱝᱥᱛᱷᱟ ᱮᱭᱟᱨᱵᱟᱥ ᱰᱤᱯᱷᱮᱱᱥ ᱮᱱᱰ ᱥᱯᱮᱹᱥ ᱞᱟᱹᱭ ᱞᱮᱫᱟᱭ ᱡᱮ ᱚᱱᱟ ᱜᱮ ᱦᱩᱭᱩᱜᱼᱟ ‘ᱢᱮᱹᱠ ᱤᱱ ᱤᱱᱰᱤᱭᱟ’ ᱨᱮᱭᱟᱜ ᱯᱩᱭᱞᱩ ᱫᱷᱟᱯ, ᱡᱟᱦᱟᱸ ᱨᱮ ᱜᱚᱲᱚ ᱞᱮᱠᱟᱛᱮ ᱠᱟᱹᱢᱤᱭᱟ ᱴᱟᱴᱟ ᱮᱰᱵᱷᱟᱱᱥ ᱥᱤᱥᱴᱮᱹᱢ ᱞᱤᱢᱤᱴᱮᱹᱰ ᱾
ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱒᱐᱒᱑ ᱥᱟᱹᱦᱤᱛ ᱨᱮ ᱕᱖ ᱴᱤ ᱥᱤ ᱒᱙᱕ ᱵᱤᱢᱟᱱ ᱵᱮᱱᱟᱣ ᱨᱮᱭᱟᱜ ᱪᱩᱠᱛᱤ ᱦᱩᱭ ᱞᱮᱱᱟ ᱮᱭᱟᱨᱵᱟᱥ ᱥᱟᱞᱟᱜ ᱛᱮ ᱾ ᱕᱖ ᱜᱚᱴᱟᱝ ᱥᱤ ᱒᱙᱕ ᱵᱤᱢᱟᱱ ᱵᱮᱱᱟᱣ ᱞᱟᱹᱜᱤᱫ ᱛᱮ ᱥᱯᱮᱹᱱ ᱒᱒ ᱦᱟᱡᱟᱨ ᱠᱳᱴᱤ ᱴᱟᱠᱟᱭ ᱮᱢ ᱟᱠᱟᱣ ᱫᱮᱭᱟ ᱱᱟᱣᱟ ᱫᱤᱞᱞᱤ ᱾ ᱟᱨ ᱴᱷᱤᱠ ᱚᱱᱟ ᱪᱩᱠᱛᱤ ᱞᱮᱠᱟᱛᱮ ᱥᱯᱮᱹᱱ ᱑᱖ ᱜᱚᱴᱟᱝ ᱵᱤᱢᱟᱱ ᱵᱷᱟᱨᱚᱛ ᱨᱮ ᱟᱢᱫᱟᱱᱤ ᱞᱮᱱ ᱛᱟᱦᱮᱱᱟ ᱾ ᱟᱨ ᱵᱟᱠᱤ ᱔᱐ ᱜᱚᱴᱟᱝ ᱫᱚ ᱵᱷᱟᱨᱚᱛ ᱨᱮᱜᱮ ᱵᱮᱱᱟᱣᱟᱭ ᱢᱮᱱᱛᱮ ᱜᱚᱴᱟ ᱟᱠᱟᱱ ᱛᱟᱦᱮᱱᱟ ᱾
