(PAPUL MURMU) JHARKHAND ELECTION BJP 2024 : ᱑᱓ ᱟᱨ ᱒᱐ ᱱᱚᱵᱷᱮᱢᱵᱚᱨ ᱡᱷᱟᱲᱠᱷᱚᱸᱰ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱾ ᱘᱑ ᱟᱥᱚᱱ ᱨᱮᱭᱟᱜ ᱡᱷᱟᱲᱠᱷᱚᱸᱰ ᱵᱤᱫᱷᱟᱱᱥᱚᱵᱷᱟ ᱨᱮ ᱫᱟᱨᱟᱭ ᱠᱟᱱ ᱢᱚᱬᱮ ᱥᱮᱨᱢᱟ ᱚᱠᱚᱭᱮ ᱛᱟᱦᱮᱱᱟ ᱠᱷᱚᱢᱚᱛᱟ ᱨᱮ ᱚᱱᱟᱫᱚ ᱵᱟᱪᱷᱱᱟᱣ ᱛᱟᱞᱟ ᱛᱮᱜᱮ ᱜᱚᱴᱟᱜᱼᱟ ᱾ ᱱᱚᱣᱟ ᱞᱟᱦᱟ ᱢᱮᱱᱫᱚ ᱒᱐᱑᱙ ᱨᱮᱭᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱡᱮᱹᱮᱢᱹᱮᱢ ᱓᱐ ᱟᱥᱚᱱ, ᱵᱤᱹᱡᱮᱹᱯᱤ ᱒᱕ ᱟᱥᱚᱱ ᱟᱨ ᱠᱚᱝᱜᱨᱮᱹᱥ ᱠᱚ ᱡᱤᱛᱠᱟᱹᱨ ᱟᱠᱟᱱᱟ ᱑᱖ ᱟᱥᱚᱱ ᱨᱮ ᱾ ᱛᱚᱵᱮ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱟᱪᱷᱱᱟᱣ ᱞᱟᱦᱟ ᱨᱮ ᱥᱤᱨᱟᱹ ᱢᱚᱱᱛᱨᱤ ᱦᱮᱢᱚᱱᱛ ᱥᱚᱨᱮᱱᱟᱜ ᱡᱮᱹᱞ ᱡᱷᱟᱛᱨᱟ ᱠᱷᱚᱱ ᱮᱛᱚᱷᱚᱵ ᱠᱟᱛᱮᱫ, ᱪᱟᱢᱯᱟᱭ ᱥᱚᱨᱮᱱᱟᱜ ᱫᱚᱞ ᱵᱟᱹᱜᱤ ᱢᱤᱫ ᱠᱷᱟᱛᱟ ᱛᱮ ᱞᱟᱹᱭ ᱜᱟᱱᱚᱜᱼᱟ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱨᱟᱡᱽᱱᱤᱛᱤ ᱨᱮ ᱢᱤᱫ ᱰᱟᱢᱟᱰᱳᱞ ᱯᱚᱨᱤᱥᱛᱤᱛᱤ ᱵᱮᱱᱟᱣ ᱟᱠᱟᱱᱟ ᱾ ᱟᱨ ᱴᱷᱤᱠ ᱚᱱᱠᱟᱱ ᱚᱠᱛᱮ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱟᱪᱷᱱᱟᱣ ᱨᱮ ᱵᱤᱹᱡᱮᱹᱯᱤ ᱟᱠᱚᱣᱟᱜ ᱤᱥᱛᱮᱦᱟᱨ ᱛᱟᱞᱟ ᱛᱮ ᱦᱮᱢᱚᱱᱛ ᱥᱚᱨᱠᱟᱨ ᱪᱟᱯ ᱨᱮ ᱜᱤᱰᱤ ᱨᱮᱭᱟᱜ ᱠᱚ ᱠᱩᱨᱩᱢᱩᱴᱩ ᱟᱠᱟᱫᱟ ᱾
ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱷᱳᱴ ᱯᱨᱚᱪᱟᱨ ᱨᱮ ᱦᱮᱡ ᱠᱟᱛᱮᱫ ᱠᱮᱱᱫᱨᱤᱭᱚ ᱥᱚᱨᱟᱥᱴᱨᱚ ᱢᱚᱱᱛᱨᱤ ᱚᱢᱤᱛ ᱥᱟᱣᱟᱜ ᱞᱟᱹᱭ, ᱡᱷᱟᱲᱠᱷᱚᱸᱰ ᱨᱮ ᱵᱤᱹᱡᱮᱹᱯᱤ ᱠᱚ ᱡᱤᱛᱠᱟᱹᱨ ᱞᱮᱱ ᱠᱷᱟᱱ ᱵᱟᱧᱪᱟᱣᱟ ᱦᱟᱥᱟ, ᱨᱚᱠᱠᱷᱟ ᱠᱚ ᱧᱟᱢᱟ ᱯᱚᱱᱚᱛ ᱨᱮᱱ ᱛᱤᱨᱞᱟᱹ ᱠᱚ ᱾ ᱥᱟᱶᱛᱮ ᱱᱚᱣᱟ ᱦᱚᱸᱭ ᱞᱟᱹᱭ ᱟᱠᱟᱫᱟ ᱡᱮ ᱦᱮᱢᱚᱱᱛ ᱥᱚᱨᱮᱱᱟᱜ ᱥᱚᱨᱠᱟᱨ ᱨᱮ ᱡᱷᱟᱲᱠᱷᱚᱸᱰ ᱨᱮᱱ ᱢᱩᱞᱵᱟᱹᱥᱤ ᱠᱚᱦᱚᱸ ᱱᱤᱨᱟᱯᱚᱫᱽ ᱨᱮ ᱵᱟᱹᱱᱩᱜ ᱟᱠᱟᱫ ᱠᱚᱣᱟ ᱾ ᱡᱷᱟᱲᱠᱷᱚᱸᱰ ᱨᱮ ᱚᱱᱩᱯᱨᱚᱵᱮᱹᱥ ᱤᱫᱤ ᱠᱟᱛᱮᱫ ᱚᱢᱤᱛ ᱥᱟᱣᱟᱜ ᱞᱟᱹᱭ ᱵᱟᱝᱞᱟᱫᱮᱹᱥ ᱠᱷᱚᱱ ᱟᱹᱰᱤᱜᱟᱱ ᱚᱱᱩᱯᱨᱚᱵᱮᱹᱥᱠᱟᱹᱨᱤ ᱥᱟᱱᱛᱟᱞ ᱯᱚᱨᱜᱚᱱᱟ ᱨᱮᱠᱚ ᱜᱤᱨᱟᱹᱵᱟᱹᱥᱤᱜ ᱠᱟᱱ ᱠᱷᱟᱹᱛᱤᱨ ᱰᱮᱢᱚᱜᱨᱟᱯᱷᱤ ᱵᱚᱫᱚᱞᱚᱜ ᱠᱟᱱᱟ ᱥᱟᱱᱛᱟᱞ ᱯᱚᱨᱜᱚᱱᱟ ᱨᱮᱭᱟᱜ ᱾ ᱡᱷᱟᱲᱠᱷᱚᱸᱰ ᱨᱮᱭᱟᱜ ᱵᱷᱳᱴ ᱞᱟᱹᱜᱤᱫ ᱵᱤᱹᱡᱮᱹᱯᱤ ᱟᱠᱚᱣᱟᱜ ᱤᱥᱛᱮᱹᱦᱟᱨ ᱨᱮ ᱒᱕ ᱜᱚᱴᱟᱝ ᱯᱨᱚᱛᱤᱥᱨᱩᱛᱤ ᱠᱚ ᱩᱪᱷᱟᱹᱱ ᱠᱮᱫᱟ ᱾
ᱛᱚᱵᱮ ᱵᱟᱪᱷᱱᱟᱣ ᱨᱮ ᱡᱤᱛᱠᱟᱹᱨ ᱞᱟᱹᱜᱤᱫ ᱵᱤᱹᱡᱮᱹᱯᱤ ᱱᱚᱣᱟ ᱞᱟᱦᱟ ᱚᱠᱴᱳᱵᱚᱨ ᱨᱮ ᱢᱚᱲᱮ ᱜᱚᱴᱟᱝ ᱯᱚᱭᱮᱱᱴ ᱨᱮᱭᱟᱜ ᱠᱟᱛᱷᱟ ᱠᱚ ᱞᱟᱹᱭ ᱞᱮᱫ ᱛᱟᱦᱮᱱᱟ ᱵᱤᱹᱡᱮᱹᱯᱤ ᱨᱮᱱ ᱡᱷᱟᱲᱠᱷᱚᱸᱰ ᱯᱚᱱᱚᱛ ᱯᱟᱨᱥᱮᱹᱫ ᱵᱟᱵᱩᱞᱟᱞ ᱢᱟᱨᱟᱱᱰᱤ ᱚᱱᱟ ᱠᱟᱛᱷᱟ ᱫᱚᱭ ᱩᱪᱷᱟᱹᱱ ᱞᱮᱫ ᱛᱟᱦᱮᱱᱟ ᱾
᱑, ᱵᱤᱹᱡᱮᱹᱯᱤᱣᱟᱜ ᱥᱚᱨᱠᱟᱨ ᱵᱮᱱᱟᱣ ᱞᱮᱱᱠᱷᱟᱱ ᱡᱷᱟᱲᱠᱷᱚᱸᱰ ᱨᱮᱱ ᱛᱤᱨᱞᱟᱹ ᱠᱚ ᱪᱟᱸᱫᱚ ᱯᱤᱪᱷᱟᱹ ᱒᱑00 ᱴᱟᱠᱟ ᱠᱟᱛᱮᱫ ᱠᱚ ᱧᱟᱢᱟ᱾
᱒, ᱵᱮᱠᱟᱨ ᱠᱚ ᱞᱟᱹᱜᱤᱫ ᱢᱚᱬᱮ ᱞᱟᱠᱷ ᱪᱟᱹᱠᱨᱤ, ᱥᱟᱱᱟᱢ ᱠᱚ ᱞᱟᱹᱜᱤᱫ ᱚᱲᱟᱜ᱾
᱓, ᱕᱐᱐ ᱴᱟᱠᱟ ᱛᱮ ᱮᱞᱹᱯᱤᱹᱡᱤ ᱨᱮᱭᱟᱜ ᱜᱮᱥ ᱥᱤᱞᱤᱱᱰᱟᱨ, ᱵᱚᱪᱷᱚᱨ ᱨᱮ ᱵᱟᱨᱭᱟ ᱥᱤᱞᱤᱱᱰᱟᱨ ᱯᱷᱨᱤ᱾
᱔, ᱰᱤᱜᱽᱨᱤ ᱨᱮᱱ ᱯᱟᱹᱴᱷᱩᱭᱟᱹ ᱠᱚ ᱒ ᱥᱮᱨᱢᱟ ᱦᱟᱹᱵᱤᱡ ᱒ ᱦᱟᱡᱟᱨ ᱴᱟᱠᱟ ᱠᱟᱛᱮᱫ ᱜᱚᱲᱚᱭ ᱮᱢᱚᱜᱼᱟ ᱥᱚᱨᱠᱟᱨ᱾
