(PAPUL MURMU) TRIBE TV SANTALI DIGITAL : ᱫᱤᱥᱟᱹᱢ ᱨᱮ ᱢᱤᱫ ᱥᱟᱶᱛᱮ ᱞᱳᱠᱥᱚᱵᱷᱟ ᱟᱨ ᱵᱤᱫᱷᱟᱱ ᱥᱚᱵᱷᱟ ᱵᱷᱳᱴ ᱠᱚᱨᱟᱣ ᱞᱟᱹᱜᱤᱫ ᱛᱮ ᱟᱹᱰᱤ ᱡᱳᱨᱮ ᱪᱷᱩᱴᱟᱹᱣ ᱟᱠᱟᱱᱟ ᱱᱚᱨᱮᱱᱫᱨᱚ ᱢᱳᱫᱤ ᱥᱚᱨᱠᱟᱨ ᱾ ᱟᱨ ᱚᱱᱟ ᱠᱷᱟᱹᱛᱤᱨ ᱛᱮ ᱞᱳᱠᱥᱚᱵᱷᱟ ᱨᱮ ᱵᱤᱨᱳᱫᱷᱤ ᱠᱚᱣᱟᱜ ᱵᱤᱨᱩᱫᱷ ᱢᱩᱫᱽ ᱨᱮᱜᱮ ᱞᱳᱠᱥᱚᱵᱷᱟ ᱨᱮ ᱚᱣᱟᱱ ᱱᱮᱥᱚᱱ ᱚᱣᱟᱱ ᱤᱞᱮᱠᱥᱚᱱ ᱵᱤᱞᱮ ᱯᱮᱹᱥ ᱠᱮᱫᱟ ᱟᱭᱤᱱ ᱢᱚᱱᱛᱨᱤ ᱚᱨᱡᱩᱱ ᱨᱟᱢ ᱢᱮᱜᱷᱟᱣᱟᱞ ᱾ ᱛᱚᱵᱮ ᱥᱚᱝᱥᱚᱫᱽ ᱨᱮ ᱵᱤ.ᱡᱮ.ᱯᱤᱼᱟᱜ ᱡᱟᱦᱟᱸ ᱞᱮᱠᱷᱟ ᱢᱮᱱᱟᱜ ᱟᱠᱟᱫᱟ ᱚᱱᱟ ᱛᱮ ᱚᱣᱟᱱ ᱱᱮᱥᱚᱱ ᱚᱣᱟᱱ ᱤᱞᱮᱠᱥᱚᱱ ᱵᱤᱞ ᱯᱟᱥ ᱫᱚ ᱠᱮᱱᱫᱨᱚ ᱥᱚᱨᱠᱟᱨ ᱞᱟᱹᱜᱤᱫ ᱠᱷᱩᱵᱽ ᱮᱠᱴᱟ ᱢᱩᱥᱠᱤᱞ ᱫᱚ ᱵᱟᱝ ᱦᱩᱭᱩᱜᱼᱟ ᱾ ᱛᱚᱵᱮ ᱠᱟᱛᱷᱟ ᱦᱩᱭᱩᱜ ᱠᱟᱱᱟ ᱯᱨᱚᱫᱷᱟᱱ ᱢᱚᱱᱛᱨᱤ ᱱᱚᱨᱮᱱᱫᱨᱚ ᱢᱳᱫᱤ ᱡᱩᱫᱤ ᱥᱟᱹᱨᱤ ᱜᱮ ᱫᱤᱥᱟᱹᱢ ᱨᱮ ᱚᱣᱟᱱ ᱱᱮᱥᱚᱱ ᱚᱣᱟᱱ ᱤᱞᱮᱠᱥᱚᱱᱮ ᱠᱷᱚᱡᱽ ᱠᱟᱱᱟ ᱛᱚᱵᱮ ᱟᱨᱦᱚᱸ ᱯᱟᱸᱪ ᱫᱚᱥᱚᱠ ᱞᱟᱦᱟ ᱨᱮ ᱪᱟᱞᱟᱜ ᱠᱟᱱ ᱛᱟᱦᱮᱱ ᱤᱞᱮᱠᱥᱚᱱ ᱵᱮᱵᱚᱥᱛᱷᱟ ᱨᱩᱣᱟᱹᱲ ᱦᱤᱡᱩᱜᱼᱟ ᱾
ᱤᱞᱮᱠᱥᱚᱱ ᱤᱫᱤ ᱠᱟᱛᱟᱫ ᱫᱤᱥᱟᱹᱢ ᱨᱮᱭᱟᱜ ᱱᱟᱜᱟᱢ ᱧᱮᱞ ᱞᱮᱠᱷᱟᱱ ᱫᱤᱥᱟᱹᱢ ᱯᱷᱩᱨᱜᱟᱹᱞ ᱞᱮᱱ ᱛᱟᱭᱚᱢ ᱑᱙᱕᱑ᱼ᱕᱒ ᱥᱟᱞ ᱨᱮ ᱯᱩᱭᱞᱩ ᱵᱟᱪᱷᱱᱟᱣ ᱢᱮᱱᱫᱚ ᱞᱳᱠᱥᱚᱵᱷᱟ ᱥᱟᱶ ᱛᱮᱜᱮ ᱯᱚᱱᱚᱛ ᱠᱚᱨᱮᱱᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱦᱚᱸ ᱦᱩᱭ ᱞᱮᱱ ᱛᱟᱦᱮᱱᱟ ᱾ ᱯᱷᱩᱨᱜᱟᱹᱞ ᱵᱷᱟᱨᱟᱛ ᱨᱮᱱ ᱯᱩᱭᱞᱩ ᱯᱨᱚᱫᱷᱟᱱ ᱢᱚᱱᱛᱨᱤ ᱯᱚᱱᱰᱤᱛ ᱡᱚᱦᱚᱨ ᱞᱟᱞ ᱱᱮᱦᱮᱨᱩ ᱟᱨ ᱩᱱᱤ ᱛᱟᱭᱚᱢ ᱟᱡ ᱨᱮᱱ ᱩᱛᱛᱚᱨ ᱥᱩᱨᱤ ᱞᱟᱞ ᱵᱟᱦᱟᱫᱩᱨ ᱥᱟᱥᱴᱨᱤᱣᱟᱜ ᱚᱠᱛᱚ ᱦᱟᱹᱵᱤᱡ ᱛᱮ ᱫᱤᱥᱟᱹᱢ ᱨᱮ ᱢᱤᱫ ᱫᱷᱟᱣ ᱛᱮᱜᱮ ᱞᱳᱠᱥᱚᱵᱷᱟ ᱟᱨ ᱵᱤᱫᱷᱟᱱ ᱥᱚᱵᱷᱟ ᱵᱟᱪᱷᱱᱟᱣ ᱫᱚ ᱦᱩᱭ ᱞᱮᱱ ᱛᱟᱦᱮᱱᱟ ᱾ ᱑᱙᱖᱗ ᱥᱟᱞ ᱨᱮ ᱢᱩᱪᱟᱹᱫ ᱫᱷᱟᱣ ᱞᱟᱹᱜᱤᱫ ᱛᱮ ᱢᱤᱫ ᱫᱮᱹᱥ ᱢᱤᱫ ᱵᱷᱳᱴ ᱵᱮᱵᱚᱥᱛᱷᱟ ᱦᱩᱭ ᱞᱮᱱ ᱛᱟᱦᱮᱱᱟ ᱾ ᱢᱮᱱᱠᱷᱟᱱ ᱩᱱ ᱚᱠᱛᱚ ᱫᱤᱥᱟᱹᱢ ᱨᱮᱭᱟᱜ ᱠᱷᱚᱢᱚᱛᱟ ᱥᱟᱵ ᱫᱚᱦᱚ ᱞᱮᱫ ᱨᱮᱦᱚᱸ ᱯᱚᱥᱪᱤᱢ ᱵᱟᱝᱞᱟ ᱥᱟᱶᱛᱮ ᱵᱮᱹᱥ ᱠᱤᱪᱷᱩ ᱜᱟᱱ ᱯᱚᱱᱚᱛ ᱨᱮ ᱦᱟᱨ ᱦᱩᱭ ᱞᱮᱱ ᱛᱟᱭᱟ ᱠᱚᱝᱜᱨᱮᱹᱥᱟᱜ ᱾ ᱚᱱᱟ ᱥᱚᱢᱚᱭ ᱨᱮᱜᱮ ᱢᱟᱨᱮ ᱠᱚᱝᱜᱨᱮᱹᱥ ᱟᱨ ᱱᱟᱣᱟ ᱠᱚᱝᱜᱨᱮᱹᱥᱟᱜ ᱠᱷᱟᱹᱯᱟᱹᱨᱤᱭᱟᱹ ᱵᱟᱹᱲᱛᱤ ᱟᱠᱟᱱ ᱛᱟᱦᱮᱱᱟ ᱾ ᱡᱟᱦᱟᱸ ᱫᱚ ᱤᱱᱫᱤᱨᱟ ᱜᱟᱱᱫᱷᱤ ᱵᱟᱭ ᱢᱟᱱᱟᱣ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱱᱟ ᱾
ᱠᱚᱝᱜᱨᱮᱹᱥ ᱨᱟᱹᱯᱩᱫ ᱛᱟᱭᱚᱢ ᱠᱚᱱᱚᱨᱚᱠᱚᱢ ᱥᱚᱨᱠᱟᱨᱮ ᱴᱤᱠᱟᱹᱣ ᱫᱚᱦᱚ ᱞᱮᱫ ᱨᱮᱦᱚᱸ ᱤᱱᱫᱤᱨᱟᱭ ᱠᱷᱚᱡᱽ ᱠᱟᱱ ᱛᱟᱦᱮᱱᱟ ᱫᱤᱥᱟᱹᱢ ᱨᱮ ᱟᱡᱟᱜ ᱜᱮ ᱮᱠᱪᱚᱛᱨᱚ ᱠᱷᱚᱢᱚᱛᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱑᱙᱗᱒ ᱥᱟᱞ ᱨᱮ ᱞᱳᱠᱥᱚᱵᱷᱟ ᱵᱷᱳᱴ ᱦᱩᱭᱩᱜ ᱨᱮᱭᱟᱜ ᱠᱟᱛᱷᱟ ᱛᱟᱦᱮᱸ ᱠᱟᱱ ᱨᱮᱦᱚᱸ ᱚᱱᱟ ᱵᱷᱳᱴ ᱦᱩᱭ ᱞᱮᱱᱟ ᱑᱕ ᱪᱟᱸᱫᱚ ᱞᱟᱦᱟ ᱨᱮ, ᱢᱮᱱᱫᱚ ᱑᱙᱗᱑ ᱨᱮᱜᱮ ᱵᱦᱳᱴ ᱫᱚ ᱦᱩᱭ ᱞᱮᱱ ᱛᱟᱦᱮᱱᱟ ᱾
᱗᱐ ᱨᱮᱭᱟᱜ ᱫᱚᱥᱚᱠ ᱨᱮ ᱤᱱᱫᱤᱨᱟ ᱜᱟᱱᱫᱷᱤ ᱵᱤᱨᱩᱫᱷ ᱨᱮ ᱱᱟᱣᱟ ᱠᱚᱝᱜᱨᱮᱹᱥ ᱨᱮᱱ ᱢᱳᱨᱟᱨᱚᱡᱤ ᱫᱮᱹᱥᱟᱭ, ᱠᱮ ᱠᱟᱢᱨᱟᱡᱽ, ᱞᱤᱡᱽᱞᱤᱝᱜᱟᱯᱯᱟ, ᱚᱛᱩᱞ ᱜᱷᱳᱥ, ᱞᱤᱞᱟᱢ ᱥᱚᱧᱡᱤᱵᱽ ᱨᱮᱹᱰᱰᱤ ᱞᱮᱠᱟᱱ ᱱᱮᱛᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱫᱤ ᱠᱚᱝᱜᱨᱮᱹᱥ ᱥᱟᱶ ᱵᱷᱤᱛᱤᱨ ᱵᱷᱤᱛᱤᱨ ᱛᱮ ᱡᱳᱜᱟᱡᱳᱜᱽ ᱠᱚ ᱫᱚᱦᱚᱭᱮᱫ ᱠᱟᱱ ᱛᱟᱦᱮᱱᱟ ᱡᱚᱱᱥᱚᱝᱜᱷᱚ, ᱟᱨ ᱥᱳᱥᱟᱞᱤᱴ ᱯᱟᱨᱴᱤ ᱞᱮᱠᱟᱱ ᱫᱚᱞ ᱠᱚ ᱾ ᱑᱙᱖᱗ ᱨᱮᱜᱮ ᱤᱱᱫᱤᱨᱟ ᱜᱟᱱᱫᱷᱤ ᱱᱟᱨᱟᱭ ᱮᱢ ᱞᱮᱫᱟ “ᱜᱟᱨᱤᱵᱤ ᱦᱟᱴᱟᱣ” ᱨᱮᱭᱟᱜ ᱾ ᱟᱨ ᱚᱱᱟ ᱛᱟᱭᱚᱢ ᱩᱱ ᱚᱠᱛᱚ ᱜᱮ ᱵᱮᱝᱠ ᱡᱟᱛᱤᱭᱚᱠᱚᱨᱚᱱ, ᱠᱚᱭᱞᱟ ᱠᱷᱚᱱᱤᱭᱟᱜ ᱡᱟᱛᱤᱭᱚᱠᱚᱨᱚᱱ ᱞᱮᱠᱟᱱ ᱟᱹᱰᱤ ᱜᱟᱱ ᱩᱛᱱᱟᱹᱣ ᱟᱱᱟᱝ ᱯᱨᱚᱠᱚᱞᱯᱚᱭ ᱩᱪᱷᱟᱹᱱ ᱞᱮᱫ ᱛᱟᱦᱮᱱᱟ ᱤᱱᱫᱤᱨᱟ ᱥᱚᱨᱠᱟᱨ ᱾ ᱢᱮᱱᱠᱷᱟᱱ ᱤᱱᱫᱤᱨᱟᱣᱟᱜ ᱚᱱᱟ ᱥᱤᱫᱽᱫᱷᱟᱱᱛᱚ ᱵᱷᱟᱹᱜᱤ ᱢᱚᱱᱮ ᱛᱮ ᱵᱟᱝᱠᱚ ᱧᱮᱞ ᱞᱮᱫᱟ ᱥᱤᱱᱰᱤᱠᱮᱹᱴ ᱠᱚᱝᱜᱨᱮᱹᱥ ᱨᱮᱱ ᱥᱚᱫᱚᱥᱥᱚ ᱠᱚ ᱾ ᱚᱱᱟ ᱛᱟᱭᱚᱢ ᱜᱮ ᱠᱚᱝᱜᱨᱮᱹᱥ ᱨᱮ ᱨᱟᱹᱯᱩᱫ ᱫᱚ ᱮᱛᱚᱦᱚᱵ ᱞᱮᱱ ᱛᱟᱦᱮᱱᱟ ᱾
ᱛᱚᱵᱮ ᱢᱩᱪᱟᱹᱫ ᱦᱟᱹᱵᱤᱡ ᱑᱙᱗᱑ ᱨᱮ ᱵᱟᱪᱷᱱᱟᱣ ᱠᱚᱨᱟᱣ ᱞᱟᱹᱜᱤᱫ ᱜᱚᱴᱟ ᱠᱮᱫᱟᱭ ᱤᱱᱫᱤᱨᱟ ᱜᱟᱱᱫᱷᱤ ᱾ ᱟᱨ ᱚᱱᱟ ᱗᱑ ᱨᱮᱭᱟᱜ ᱵᱟᱪᱷᱱᱟᱣ ᱨᱮ ᱓᱕᱒ ᱜᱚᱴᱟᱝ ᱥᱤᱴ ᱨᱮ ᱡᱤᱛᱠᱟᱹᱨ ᱠᱟᱛᱮᱫ ᱠᱷᱚᱢᱚᱛᱟ ᱨᱮᱭ ᱦᱮᱡ ᱞᱮᱱᱟ ᱱᱟᱣᱟ ᱠᱚᱝᱜᱨᱮᱹᱥ ᱾ ᱟᱨ ᱢᱟᱨᱮ ᱠᱚᱝᱜᱨᱮᱹᱥᱮ ᱡᱤᱛᱠᱟᱹᱨ ᱞᱮᱱᱟ ᱑᱖ ᱜᱚᱴᱟᱝ ᱥᱤᱴ ᱨᱮ ᱾ ᱢᱮᱱᱠᱷᱟᱱ ᱵᱷᱟᱨᱚᱛ ᱨᱮᱭᱟᱜ ᱥᱚᱝᱵᱤᱫᱷᱟᱱ ᱨᱮ ᱚᱠᱟ ᱨᱮᱦᱚᱸ ᱚᱞ ᱵᱟᱹᱱᱩᱜᱼᱟ ᱢᱤᱫ ᱥᱟᱶᱛᱮ ᱞᱳᱠᱥᱚᱵᱷᱟ ᱟᱨ ᱵᱤᱫᱷᱟᱱᱥᱚᱵᱷᱟ ᱵᱷᱳᱴ ᱠᱚᱨᱟᱣ ᱨᱮᱭᱟᱜ ᱾ ᱑᱙᱕᱒ ᱨᱮ ᱡᱟᱦᱟᱸ ᱞᱮᱠᱟ ᱵᱟᱪᱷᱱᱟᱣ ᱦᱩᱭ ᱞᱮᱱ ᱛᱟᱦᱮᱱᱟ ᱴᱷᱤᱠ ᱚᱱᱠᱟ ᱜᱮ ᱟᱨᱦᱚᱸ ᱫᱚᱲᱦᱟ ᱛᱮ ᱵᱷᱳᱴ ᱠᱚᱨᱟᱣ ᱯᱨᱚᱫᱷᱟᱱᱢᱚᱱᱛᱨᱤ ᱱᱚᱨᱮᱱᱫᱨᱚ ᱴᱷᱮᱱ ᱢᱟᱨᱟᱝ ᱪᱮᱞᱮᱧᱡᱽ ᱠᱟᱱᱟ ᱾
