ᱰᱩᱣᱟᱨᱥ ᱨᱮ ᱦᱟᱹᱛᱤ ᱦᱟᱢᱞᱟ ᱛᱮ ᱦᱚᱲ ᱠᱚᱣᱟᱜ ᱜᱚᱡᱼᱜᱩᱨ ᱨᱮᱱᱟᱜ ᱞᱮᱠᱷᱟᱱ ᱟᱹᱰᱤ ᱵᱟᱹᱲᱛᱤ ᱧᱮᱞ ᱠᱟᱛᱮ ᱵᱷᱟᱵᱽᱱᱟᱭ ᱥᱚᱫᱚᱨ ᱠᱮᱫᱟ ᱵᱤᱨ ᱵᱤᱵᱷᱟᱜᱽ ᱨᱮᱱ ᱯᱨᱚᱛᱤᱢᱚᱱᱛᱨᱤ ᱵᱤᱨᱵᱟᱦᱟ ᱦᱟᱸᱥᱫᱟ ᱾ ᱵᱤᱨ ᱦᱟᱹᱛᱤ ᱟᱨ ᱦᱚᱲ ᱦᱚᱸ ᱵᱟᱧᱪᱟᱣ ᱠᱚ ᱦᱩᱭᱩᱜᱼᱟ ᱾ ᱟᱨ ᱱᱚᱣᱟ ᱛᱚ ᱦᱟᱹᱛᱤ ᱞᱩᱛᱩᱨ ᱨᱮ ᱥᱟᱵ ᱠᱟᱛᱮ ᱫᱚ ᱵᱩᱡᱷᱟᱹᱣ ᱵᱟᱝ ᱜᱟᱱᱚᱜᱼᱟ, ᱚᱱᱟᱛᱮ ᱢᱟᱹᱱᱢᱤ ᱜᱮ ᱥᱚᱱᱛᱚᱨ ᱨᱮ ᱛᱟᱦᱮᱱ ᱦᱩᱭᱩᱜ ᱛᱟᱵᱚᱱᱟ ᱢᱮᱱᱛᱮᱭ ᱞᱟᱹᱭ ᱠᱮᱫᱟ ᱢᱚᱱᱛᱨᱤ ᱵᱤᱨᱵᱟᱦᱟ ᱦᱟᱸᱥᱫᱟ ᱾ ᱟᱨ ᱚᱱᱟ ᱥᱟᱶᱛᱮ ᱵᱤᱨ ᱵᱤᱵᱷᱟᱜᱽ ᱨᱮᱱ ᱟᱹᱢᱟᱹᱞᱤᱭᱟᱹᱣᱟᱜ ᱞᱮᱠᱷᱟ ᱦᱚᱸ ᱟᱹᱰᱤ ᱠᱚᱢ ᱜᱮᱭᱟ ᱢᱮᱱᱛᱮᱭ ᱥᱤᱠᱟᱹᱨ ᱦᱟᱛᱟᱣ ᱠᱮᱫᱟ ᱾ ᱢᱚᱱᱛᱨᱤ ᱵᱤᱨᱵᱟᱦᱟᱣᱟᱜ ᱞᱟᱹᱭ ᱵᱤᱨ ᱵᱤᱵᱷᱟᱜᱽ ᱨᱮᱱ ᱠᱟᱹᱢᱤᱭᱟᱹ ᱠᱚᱣᱟᱜ ᱞᱮᱠᱷᱟ ᱠᱚᱢ ᱜᱮ ᱨᱮᱦᱚᱸ ᱠᱟᱹᱢᱤᱭᱟᱹ ᱠᱚ ᱒᱔ ᱜᱷᱚᱱᱴᱟ ᱠᱚ ᱠᱟᱹᱢᱤᱭᱮᱫᱟ ᱾ ᱫᱟᱨᱟᱭᱠᱟᱱ ᱫᱤᱱ ᱨᱮ ᱵᱤᱨ ᱵᱤᱵᱷᱟᱜᱽ ᱨᱮ ᱟᱨᱦᱚᱸ ᱟᱭᱢᱟ ᱠᱟᱹᱢᱤᱭᱟᱹ ᱱᱤᱭᱳᱜᱽ ᱨᱮᱱᱟᱜ ᱟᱵᱮᱹᱫᱚᱱ ᱵᱤᱫᱷᱟᱱᱥᱚᱵᱷᱟ ᱨᱮ ᱯᱟᱥ ᱟᱠᱟᱱᱟ ᱾
ᱟᱹᱫᱤᱵᱟᱹᱥᱤ ᱠᱚᱣᱟᱜ ᱵᱷᱟᱹᱞᱟᱹᱭ ᱞᱟᱹᱜᱤᱫ ᱢᱚᱱᱛᱨᱤ ᱠᱚᱣᱟᱜ ᱫᱩᱯᱩᱲᱩᱵ
ᱥᱚᱨᱠᱟᱨᱤ ᱥᱩᱡᱳᱜᱽ ᱥᱩᱵᱤᱫᱷᱟ ᱟᱹᱫᱤᱵᱟᱹᱥᱤ ᱠᱚ ᱴᱷᱤᱠ ᱥᱟᱺᱦᱤᱡ ᱠᱚ ᱧᱟᱢᱮᱫᱟ ᱥᱮ ᱵᱟᱝ ᱮᱢᱚᱱ ᱪᱮᱫ ᱩᱱᱠᱩᱣᱟᱜ ᱟᱨ ᱪᱮᱫ ᱪᱮᱫ ᱠᱚ ᱫᱟᱹᱵᱤ ᱢᱮᱱᱟᱜᱼᱟ ᱚᱱᱟᱠᱚ ᱵᱟᱰᱟᱭ ᱞᱟᱹᱜᱤᱫ ᱟᱹᱫᱤᱵᱟᱹᱥᱤ ᱥᱚᱢᱟᱡᱽ ᱨᱮᱱ ᱯᱨᱚᱛᱤᱱᱤᱫᱷᱤ ᱠᱚ ᱥᱟᱶ ᱫᱩᱲᱩᱵ ᱠᱟᱛᱮ ᱠᱚ ᱜᱟᱯᱟᱞᱢᱟᱨᱟᱣ ᱠᱮᱫᱟ ᱯᱚᱱᱚᱛ ᱨᱮᱱ ᱯᱩᱱᱭᱟ ᱢᱚᱱᱛᱨᱤ ᱾ ᱡᱟᱹᱨᱩᱢ ᱢᱟᱦᱟ ᱛᱟᱨᱟᱥᱤᱧ ᱡᱚᱞᱯᱟᱭᱜᱩᱲᱤ ᱨᱮᱱᱟᱜ ᱱᱟᱜᱽᱨᱟᱠᱟᱴᱟ ᱵᱞᱚᱠ ᱵᱷᱚᱜᱚᱛᱯᱩᱨ ᱪᱟᱼᱵᱟᱜᱟᱱ ᱨᱮᱱᱟᱜ ᱯᱷᱩᱴᱵᱚᱞ ᱠᱷᱮᱹᱞᱳᱰ ᱰᱟᱹᱦᱤ ᱨᱮ ᱟᱹᱫᱤᱵᱟᱹᱥᱤ ᱥᱚᱢᱟᱡᱽ ᱨᱮᱱ ᱦᱚᱲ ᱠᱚ ᱟᱛᱮ ᱜᱟᱞᱢᱟᱨᱟᱣ ᱠᱮᱫᱟ ᱾ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ ᱟᱹᱫᱤᱵᱟᱹᱥᱤ ᱩᱱᱱᱚᱭᱚᱱ ᱢᱚᱱᱛᱨᱤ ᱵᱩᱞᱩᱪᱤᱠ ᱵᱚᱲᱟᱭᱤᱠ, ᱵᱚᱱᱚᱢᱚᱱᱛᱨᱤ ᱵᱤᱨᱵᱟᱦᱟ ᱦᱟᱸᱥᱫᱟ, ᱯᱚᱥᱪᱤᱢᱟᱧᱪᱚᱞ ᱩᱱᱱᱚᱭᱚᱱ ᱢᱚᱱᱛᱨᱤ ᱥᱚᱱᱫᱷᱟᱨᱟᱱᱤ ᱴᱩᱰᱩ, ᱟᱨ ᱠᱷᱟᱫᱽᱫᱚ ᱯᱨᱚᱛᱤᱢᱚᱱᱛᱨᱤ ᱡᱳᱥᱱᱟ ᱢᱟᱱᱰᱤ ᱾ ᱱᱚᱣᱟ ᱜᱟᱞᱢᱟᱨᱟᱣ ᱨᱮᱠᱚ ᱥᱮᱞᱮᱫ ᱞᱮᱱᱟ ᱢᱟᱦᱟᱞᱤ, ᱢᱩᱱᱰᱟ, ᱳᱨᱟᱶ ᱥᱟᱶᱛᱮ ᱟᱨᱦᱚᱸ ᱵᱷᱮᱜᱟᱨᱼᱵᱷᱮᱜᱟᱨ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱨᱮᱱ ᱯᱨᱚᱛᱤᱱᱤᱫᱷᱤ ᱠᱚ ᱾ ᱢᱚᱱᱛᱨᱤ ᱥᱟᱢᱟᱝ ᱨᱮ ᱩᱱᱠᱩ ᱟᱠᱳᱣᱟᱜ ᱟᱱᱟᱴ ᱠᱚ ᱥᱟᱵ ᱨᱟᱠᱟᱵ ᱠᱮᱫᱟ ᱾
ᱥᱤᱨᱟᱹ ᱢᱚᱱᱛᱨᱤᱭᱟᱜ ᱟᱸᱫᱮ
ᱵᱟᱰᱟᱭ ᱛᱮᱱᱟᱜ ᱠᱟᱛᱷᱟ ᱠᱟᱱᱟ ᱟᱹᱫᱤᱵᱟᱹᱥᱤ ᱠᱚᱣᱟᱜ ᱩᱛᱱᱟᱹᱣ ᱞᱟᱹᱜᱤᱫ ᱥᱤᱨᱟᱹ ᱢᱚᱱᱛᱨᱤ ᱢᱚᱢᱚᱛᱟ ᱵᱚᱱᱫᱳᱯᱟᱫᱽᱫᱷᱟᱭ ᱫᱟᱭᱵᱷᱟᱨᱮ ᱮᱢ ᱟᱠᱟᱫ ᱠᱚᱣᱟ ᱯᱩᱱᱭᱟ ᱢᱚᱱᱛᱨᱤ ᱾ ᱱᱚᱵᱷᱮᱹᱢᱵᱚᱨ ᱪᱟᱸᱫᱳ ᱨᱮ ᱱᱚᱵᱟᱱᱱᱚ ᱨᱮᱱᱟᱜ ᱵᱚᱹᱭᱴᱷᱚᱠ ᱠᱷᱚᱱ ᱱᱚᱣᱟ ᱟᱸᱫᱮᱭ ᱮᱢᱟᱜ ᱠᱚ ᱛᱟᱦᱮᱸᱫ ᱥᱚᱱᱫᱷᱟᱨᱟᱱᱤ ᱴᱩᱰᱩ, ᱵᱤᱨᱵᱟᱦᱟ ᱦᱟᱸᱥᱫᱟ, ᱡᱳᱥᱱᱟ ᱢᱟᱱᱰᱤ ᱟᱨ ᱵᱩᱞᱩᱪᱤᱠ ᱵᱚᱲᱟᱭᱤᱠ ᱾
᱒᱐᱒᱖ ᱨᱮᱱᱟᱜ ᱵᱟᱪᱷᱱᱟᱣ ᱨᱮ ᱢᱟᱨᱟᱝ ᱯᱷᱮᱠᱴᱚᱨ ᱟᱹᱫᱤᱵᱟᱹᱥᱤ ᱵᱷᱳᱴ
᱒᱐᱒᱖ ᱥᱟᱹᱦᱤᱛ ᱨᱮᱱᱟᱜ ᱵᱤᱫᱷᱟᱱᱥᱚᱵᱷᱟ ᱵᱟᱪᱷᱱᱟᱣ ᱨᱮ ᱟᱭᱢᱟ ᱡᱮᱞᱟ ᱨᱮ ᱢᱟᱨᱟᱝ ᱯᱷᱮᱠᱴᱚᱨ ᱠᱟᱱᱟ ᱟᱹᱫᱤᱵᱟᱹᱥᱤ ᱵᱷᱳᱴ ᱾ ᱚᱱᱟ ᱫᱤᱥᱟᱹ ᱠᱟᱛᱮ ᱜᱮ ᱱᱚᱣᱟ ᱠᱟᱹᱢᱤᱦᱚᱨᱟ ᱫᱚᱠᱚ ᱮᱛᱚᱦᱚᱵ ᱟᱠᱟᱫᱟ ᱯᱩᱱᱭᱟ ᱢᱚᱱᱛᱨᱤᱭᱟᱜ ᱱᱚᱣᱟ ᱵᱤᱥᱮᱹᱥ ᱫᱚᱞ ᱾ ᱟᱨ ᱱᱚᱣᱟ ᱜᱟᱯᱟᱞᱢᱟᱨᱟᱣ ᱫᱚ ᱫᱟᱨᱟᱭᱠᱟᱱ ᱫᱤᱱ ᱨᱮ ᱯᱚᱱᱚᱛ ᱨᱮᱱᱟᱜ ᱟᱨᱦᱚᱸ ᱟᱭᱢᱟ ᱴᱚᱴᱷᱟ ᱨᱮᱜᱮ ᱠᱚ ᱥᱟᱯᱲᱟᱣᱟ ᱢᱮᱱᱛᱮ ᱵᱟᱰᱟᱭᱚᱜ ᱠᱟᱱᱟ ᱾
