ᱟᱭᱢᱟ ᱫᱤᱱ ᱠᱷᱚᱱ ᱥᱟᱱᱛᱟᱲ ᱦᱚᱯᱚᱱ ᱛᱟᱞᱟ ᱨᱮ ᱫᱷᱚᱨᱚᱢ ᱠᱳᱰ ᱨᱮᱱᱟᱜ ᱛᱮᱛᱟᱝ ᱢᱮᱱᱟᱜᱼᱟ ᱾ ᱟᱨ ᱚᱱᱟ ᱵᱟᱵᱚᱫᱽ ᱢᱤᱫ ᱞᱮᱛᱟᱲ ᱥᱟᱱᱛᱟᱲ ᱟᱹᱜᱩᱣᱟᱹᱱ ᱠᱚ ᱪᱷᱩᱴᱟᱹᱣ ᱟᱠᱟᱱᱟ ᱾ ᱢᱮᱱᱫᱚ ᱱᱚᱵᱷᱮᱢᱵᱚᱨ ᱪᱟᱸᱫᱳ ᱨᱮᱱᱟᱜ ᱒᱕ ᱛᱟᱹᱨᱤᱠᱷ ᱠᱷᱚᱱ ᱮᱛᱚᱦᱚᱵ ᱟᱠᱟᱱᱟ ᱥᱚᱝᱥᱚᱫᱽ ᱨᱮ ᱩᱭᱤᱱᱴᱟᱨ ᱥᱮᱥᱮᱱ ᱾ ᱟᱨ ᱢᱩᱪᱟᱹᱫᱚᱜᱼᱟ ᱰᱤᱥᱮᱢᱵᱚᱨ ᱪᱟᱸᱫᱳ ᱨᱮᱱᱟᱜ ᱒᱐ ᱢᱟᱹᱦᱤᱛ ᱦᱤᱞᱳᱜ ᱾ ᱱᱚᱣᱟ ᱛᱟᱠ ᱨᱮᱜᱮ ᱫᱷᱚᱨᱚᱢ ᱠᱳᱰ ᱨᱮᱱᱟᱜ ᱫᱟᱹᱵᱤ ᱠᱟᱛᱮ ᱫᱤᱞᱞᱤ ᱢᱟᱨᱟᱝ ᱢᱚᱱᱛᱨᱤ ᱟᱨ ᱦᱳᱢ ᱢᱤᱱᱤᱥᱴᱟᱨ ᱴᱷᱮᱱ ᱠᱚ ᱥᱮᱴᱮᱨᱮᱱᱟ ᱥᱟᱹᱨᱤᱼᱫᱷᱚᱨᱚᱢ ᱥᱟᱱᱛᱟᱲ ᱦᱚᱯᱚᱱ ᱾
ᱫᱷᱚᱨᱚᱢ ᱨᱟᱯᱟᱪᱟᱜ
ᱟᱭᱢᱟ ᱫᱤᱱ ᱠᱷᱚᱱ ᱥᱟᱱᱛᱟᱲ ᱦᱚᱯᱚᱱ ᱛᱟᱞᱟᱨᱮ ᱫᱷᱚᱨᱚᱢ ᱨᱮᱱᱟᱜ ᱨᱟᱯᱟᱪᱟᱜ ᱦᱚᱸ ᱪᱟᱞᱟᱜ ᱠᱟᱱᱟ ᱾ ᱢᱮᱱᱫᱚ ᱢᱤᱫ ᱥᱟᱹᱨ ᱨᱮᱱ ᱥᱟᱱᱛᱟᱲ ᱦᱚᱯᱚᱱᱟᱜ ᱢᱮᱱ ᱥᱟᱱᱟᱢ ᱟᱹᱫᱤᱵᱟᱹᱥᱤ ᱟᱛᱮ ᱢᱤᱫᱴᱮᱱ ᱫᱷᱚᱨᱚᱢ ᱠᱳᱰ ᱦᱟᱛᱟᱣ ᱨᱮᱱᱟᱜ ᱠᱚ ᱫᱟᱹᱵᱤ ᱟᱨ ᱢᱤᱫ ᱥᱟᱹᱨ ᱨᱮᱱ ᱥᱟᱱᱛᱟᱲ ᱦᱚᱯᱚᱱᱟᱜ ᱢᱮᱱ, ᱥᱟᱱᱛᱟᱲ ᱨᱮᱱ ᱵᱚᱸᱜᱟᱼᱵᱩᱨᱩ, ᱞᱟᱭᱼᱞᱟᱠᱪᱟ, ᱥᱮᱨᱣᱟᱼᱥᱟᱶᱛᱟ ᱥᱟᱱᱟᱢᱟᱜ ᱵᱷᱮᱜᱟᱨ ᱜᱮᱭᱟ, ᱚᱱᱟᱛᱮ ᱫᱷᱚᱨᱚᱢ ᱦᱚᱸ ᱵᱷᱮᱜᱟᱨ ᱜᱮᱭᱟ ᱾ ᱢᱮᱱᱫᱚ ᱥᱟᱹᱨᱤ ᱫᱷᱚᱨᱚᱢ ᱧᱩᱛᱩᱢ ᱛᱮ ᱠᱳᱰ ᱠᱚ ᱠᱚᱠᱚᱭ ᱠᱟᱱᱟ ᱾ ᱡᱩᱰᱤᱭᱳ ᱥᱟᱹᱨᱤ ᱫᱷᱚᱨᱚᱢ ᱵᱟᱵᱚᱫᱽ ᱛᱮ ᱫᱟᱹᱵᱤ ᱥᱟᱠᱟᱢ ᱫᱤᱞᱞᱤ ᱨᱮᱠᱚ ᱪᱟᱞ ᱠᱮᱫᱟ, ᱮᱱᱦᱚᱸ ᱥᱟᱱᱛᱟᱲ ᱦᱚᱯᱚᱱ ᱛᱟᱞᱟᱨ ᱥᱟᱹᱨᱤ ᱟᱨ ᱥᱟᱨᱱᱟ ᱨᱮᱱᱟᱜ ᱨᱟᱯᱟᱪᱟᱜ ᱫᱚ ᱞᱮᱛᱟᱲ ᱢᱮᱱᱟᱜᱼᱟ ᱥᱳᱥᱟᱞ ᱢᱤᱰᱤᱭᱟ ᱨᱮ ᱾
ᱫᱟᱹᱵᱤ ᱥᱟᱠᱟᱢ
ᱮᱯᱚᱭᱢᱮᱱᱴ ᱵᱟᱝ ᱧᱟᱢ ᱠᱷᱟᱹᱛᱤᱨ ᱢᱟᱨᱟᱝ ᱢᱚᱱᱛᱨᱤ, ᱦᱳᱢ ᱢᱤᱱᱤᱥᱴᱟᱨ ᱟᱨ ᱢᱤᱱᱤᱥᱴᱟᱨ ᱚᱯᱷ ᱴᱨᱟᱭᱵᱮᱞ ᱮᱯᱷᱮᱭᱟᱨᱥᱟᱜ ᱫᱚᱯᱛᱚᱨ ᱨᱮ ᱫᱟᱹᱵᱤ ᱥᱟᱠᱟᱢ ᱠᱚ ᱪᱟᱞ ᱠᱮᱫᱟ ᱥᱟᱹᱨᱤ ᱫᱷᱚᱨᱢ ᱠᱳᱰ ᱠᱚᱢᱤᱴᱤ ᱨᱮᱱ ᱡᱟᱹᱡᱤᱞᱢᱟᱱ ᱨᱟᱹᱥᱤᱭᱟᱹ ᱠᱚ ᱾ ᱫᱚᱯᱛᱚᱨ ᱯᱟᱦᱴᱟ ᱠᱷᱚᱱ ᱵᱟᱰᱟᱭ ᱟᱠᱟᱱᱟ ᱛᱟᱭᱚᱢ ᱫᱟᱨᱟᱢ ᱛᱚᱞᱟᱥ ᱦᱟᱛᱟᱣ ᱨᱮᱱᱟᱜ ᱠᱟᱛᱷᱟ ᱠᱚ ᱞᱟᱹᱭ ᱟᱠᱟᱫ ᱠᱚᱣᱟ ᱾
