(PAPUL MURMU) BANGLADESH TRIBE TV DIGITAL : ᱵᱟᱝᱞᱟᱫᱮᱹᱥ ᱨᱮ ᱥᱮᱹᱠᱷ ᱦᱟᱥᱤᱱᱟᱣᱟᱜ ᱥᱚᱨᱠᱟᱨ ᱨᱟᱹᱯᱩᱫ ᱛᱟᱭᱚᱢ ᱫᱤᱱ ᱫᱤᱱ ᱛᱮ ᱵᱟᱝᱞᱟᱫᱮᱹᱥ ᱨᱮᱭᱟᱜ ᱪᱤᱛᱟᱹᱨ ᱜᱮ ᱵᱚᱫᱚᱞ ᱟᱠᱟᱱᱟ ᱾ ᱫᱤᱱᱟᱹᱢ ᱜᱮ ᱵᱟᱝᱞᱟᱫᱮᱹᱥ ᱨᱮᱱ ᱥᱚᱝᱠᱷᱟᱞᱚᱜᱷᱩ ᱦᱚᱲ ᱠᱚ ᱪᱮᱛᱟᱱ ᱱᱟᱦᱟᱪᱟᱨ ᱵᱟᱹᱲᱛᱤ ᱪᱟᱞᱟᱜ ᱠᱟᱱᱟ ᱾ ᱟᱨ ᱚᱱᱟ ᱱᱟᱦᱟᱪᱟᱨ ᱠᱷᱚᱱ ᱵᱟᱫᱽ ᱵᱟᱝᱠᱚ ᱛᱟᱦᱮᱸ ᱞᱮᱱᱟ ᱵᱟᱝᱞᱟᱫᱮᱹᱥ ᱨᱮᱱ ᱟᱹᱫᱤᱵᱟᱹᱥᱤ ᱥᱟᱱᱛᱟᱲ ᱠᱚᱦᱚᱸ ᱾
ᱵᱟᱝᱞᱟᱫᱮᱹᱥ ᱨᱮᱭᱟᱜ ᱜᱟᱭᱵᱟᱸᱫᱷᱟᱨ ᱜᱳᱵᱤᱱᱫᱽᱜᱚᱸᱡᱽ ᱨᱮ ᱡᱚᱢᱤ ᱵᱤᱵᱟᱹᱫᱽ ᱠᱷᱟᱹᱛᱤᱨ ᱢᱤᱫ ᱥᱟᱱᱛᱟᱲ ᱛᱤᱨᱞᱟᱹᱣᱟᱜ ᱚᱲᱟᱜ ᱨᱮ ᱥᱮᱸᱜᱮᱞ ᱫᱷᱚᱨᱟᱣ ᱠᱟᱛᱮᱫ ᱩᱱᱤ ᱫᱟᱞ ᱦᱚᱸ ᱦᱩᱭ ᱟᱠᱟᱱᱟ ᱢᱮᱱᱛᱮ ᱟᱵᱷᱤᱡᱳᱜᱽ ᱨᱟᱠᱟᱵ ᱟᱠᱟᱱᱟ ᱛᱷᱟᱹᱱᱤᱛ (ᱥᱛᱷᱟᱱᱤᱭᱚ) ᱤᱭᱩᱱᱤᱭᱚᱱ ᱯᱚᱨᱤᱥᱚᱫᱽ ᱨᱮᱱ ᱪᱮᱭᱟᱨᱢᱮᱱ ᱵᱤᱨᱩᱫᱷ ᱨᱮ ᱾ ᱚᱱᱟ ᱫᱚ ᱔ ᱡᱟᱱᱩᱣᱟᱨᱤ ᱧᱤᱫᱟᱹ ᱵᱮᱲᱟ ᱑᱑ ᱵᱟᱡᱟᱜ ᱚᱠᱛᱚ ᱩᱯᱚᱡᱮᱞᱟ ᱨᱮᱭᱟᱜ ᱥᱟᱠᱷᱟᱦᱟᱨ ᱤᱭᱩᱱᱤᱭᱚᱱ ᱨᱟᱡᱟᱵᱤᱨᱟᱴ ᱴᱚᱴᱷᱟ ᱨᱮᱭᱟᱜ ᱵᱚᱨᱚᱴᱴᱚ ᱟᱹᱛᱩ ᱨᱮᱭᱟᱜ ᱜᱷᱚᱴᱚᱱ ᱠᱟᱱᱟ ᱾ ᱡᱟᱦᱟᱸᱭ ᱥᱟᱱᱛᱟᱲ ᱛᱤᱨᱞᱟᱹ ᱪᱮᱛᱟᱱ ᱨᱮ ᱱᱟᱦᱟᱪᱟᱨ ᱦᱩᱭ ᱟᱠᱟᱱᱟ ᱩᱱᱤᱭᱟᱜ ᱧᱩᱛᱩᱢ ᱫᱚ ᱯᱷᱤᱞᱳᱢᱤᱱᱟ ᱦᱟᱸᱥᱫᱟ ᱾ ᱟᱨ ᱩᱢᱮᱨ ᱛᱟᱭ ᱕᱕ ᱥᱮᱨᱢᱟ ᱾ ᱛᱚᱵᱮ ᱚᱱᱟ ᱜᱷᱚᱴᱚᱱ ᱛᱟᱭᱚᱢ ᱯᱷᱤᱞᱳᱢᱤᱱᱟ ᱫᱚ ᱡᱤᱭᱟᱣᱩᱨ ᱨᱚᱦᱚᱢᱟᱱ ᱢᱮᱹᱰᱤᱠᱮᱞ ᱠᱚᱞᱮᱡᱽ ᱦᱟᱥᱯᱟᱛᱟᱞ ᱨᱮ ᱛᱤᱠᱪᱷᱟᱹ ᱞᱟᱹᱜᱤᱫ ᱛᱮ ᱵᱷᱩᱨᱛᱤ ᱢᱮᱱᱟᱭ ᱟᱠᱟᱫᱮᱭᱟ ᱢᱮᱱᱛᱮ ᱚᱲᱟᱜ ᱦᱚᱲᱟᱜ ᱞᱟᱹᱭ ᱞᱮᱠᱟᱛᱮ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾
ᱵᱟᱝᱢᱟ ᱜᱳᱵᱤᱱᱫᱽᱜᱚᱸᱡᱽ ᱨᱮᱭᱟᱜ ᱥᱟᱠᱷᱟᱦᱟᱨ ᱤᱭᱩᱱᱤᱭᱚᱱ ᱵᱚᱨᱚᱴᱴᱚ ᱟᱹᱛᱩ ᱨᱮ ᱡᱳᱣᱟᱥ ᱢᱩᱨᱢᱩᱣᱟᱜ ᱑᱖ ᱥᱚᱛᱚᱠ ᱵᱟᱲᱜᱮ ᱛᱟᱦᱮᱸ ᱠᱟᱱᱟ, ᱟᱨ ᱚᱱᱟ ᱵᱟᱲᱜᱮ ᱫᱚᱠᱷᱚᱞ ᱞᱟᱹᱤᱫ ᱜᱮ ᱤᱭᱩᱱᱤᱭᱚᱱ ᱯᱚᱨᱤᱥᱚᱫᱽ ᱨᱮᱱ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱠᱤᱪᱷᱩ ᱦᱚᱲ ᱟᱛᱮ ᱚᱱᱟ ᱵᱟᱲᱜᱮ ᱨᱮ ᱦᱟᱥᱟᱭ ᱯᱮᱨᱮᱡᱮᱫ ᱠᱟᱱ ᱛᱟᱦᱮᱱᱟ ᱾ ᱟᱨ ᱚᱱᱟ ᱠᱚ ᱧᱮᱞ ᱠᱟᱛᱮ ᱵᱚᱨᱚᱴᱴᱚ ᱟᱹᱛᱩ ᱨᱮᱱ ᱠᱤᱪᱷᱩ ᱜᱟᱱ ᱥᱟᱱᱛᱟᱲ ᱦᱚᱲ (ᱠᱚᱲᱟ) ᱠᱚ ᱦᱟᱥᱟ ᱯᱮᱨᱮᱡ ᱠᱚ ᱢᱟᱱᱟ ᱠᱮᱫ ᱠᱚᱣᱟ ᱾ ᱴᱷᱤᱠ ᱚᱱᱟ ᱚᱠᱛᱚ ᱜᱮ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱨᱮᱱ ᱦᱚᱲ ᱩᱱᱤ ᱥᱟᱢᱟᱝ ᱨᱮᱜᱮ ᱱᱤᱠᱳᱞᱟᱥ ᱢᱩᱨᱢᱩ ᱫᱟᱞ ᱠᱟᱛᱮᱫ ᱚᱸᱰᱮ ᱠᱷᱚᱱ ᱠᱚ ᱞᱟᱜᱟ ᱠᱮᱫᱮᱭᱟ ᱾ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱫᱚ ᱵᱤ ᱮᱱ ᱯᱤ ᱨᱮᱱ ᱡᱩᱜᱽᱢᱚ ᱥᱚᱢᱯᱟᱫᱚᱠ ᱦᱩᱫᱟᱹ ᱨᱮ ᱢᱮᱱᱟᱭ ᱟᱠᱟᱫᱮᱭᱟ ᱢᱮᱱᱛᱮ ᱥᱩᱛᱨᱚ ᱞᱮᱠᱟᱛᱮ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾
ᱚᱱᱟ ᱴᱚᱴᱷᱟ ᱨᱮᱱ ᱜᱮ ᱢᱤᱫ ᱥᱟᱱᱛᱟᱲ ᱦᱚᱲᱟᱜ ᱞᱟᱹᱭ ᱟᱡ ᱨᱮᱱ ᱵᱚᱭᱦᱟ ᱪᱮᱛᱟᱱ ᱚᱱᱟ ᱜᱷᱚᱴᱚᱱ ᱧᱮᱞ ᱠᱟᱛᱮᱫ ᱯᱨᱚᱛᱤᱵᱟᱫᱽ ᱞᱟᱹᱜᱤᱫᱼᱮ ᱪᱟᱞᱟᱣ ᱞᱮᱱ ᱠᱷᱟᱱ ᱵᱟᱝᱢᱟ ᱟᱡ ᱦᱚᱸ ᱪᱮᱭᱟᱨᱢᱮᱱ ᱴᱷᱮᱸᱜᱟ ᱟᱛᱮᱭ ᱞᱟᱜᱟ ᱠᱮᱫᱮᱭᱟ ᱾ ᱟᱨ ᱴᱷᱤᱠ ᱩᱱ ᱡᱚᱠᱷᱚᱱ ᱜᱮ ᱟᱡ ᱜᱚᱜᱚ ᱪᱮᱭᱟᱨᱢᱮᱱᱟᱜ ᱛᱤ ᱠᱷᱚᱱ ᱴᱷᱮᱸᱜᱟ ᱨᱮᱡ ᱞᱟᱹᱜᱤᱫ ᱛᱮ ᱪᱟᱞᱟᱣ ᱞᱮᱱ ᱠᱷᱟᱱ ᱪᱮᱭᱟᱨᱢᱮᱱ ᱩᱱᱤ ᱞᱩᱛᱩᱨ ᱨᱮᱭ ᱫᱟᱞ ᱞᱮᱫᱮᱭᱟ ᱾ ᱟᱨ ᱚᱱᱟ ᱛᱟᱭᱚᱢ ᱟᱡ ᱜᱚᱜᱚ ᱚᱛ ᱨᱮᱭ ᱵᱷᱤᱸᱫᱟᱹᱲᱮᱱᱟ ᱞᱩᱛᱩᱨ ᱠᱷᱚᱱ ᱢᱟᱭᱟᱢ ᱧᱩᱨ ᱮᱛᱚᱦᱚᱵ ᱞᱮᱱ ᱛᱟᱭᱟ ᱾ ᱩᱱᱤᱭᱟᱜ ᱞᱩᱛᱩᱨ ᱠᱷᱚᱱ ᱢᱟᱭᱟᱢ ᱡᱚᱨᱚᱜ ᱧᱮᱞ ᱠᱟᱛᱮᱫ ᱯᱷᱤᱞᱳᱢᱤᱱᱟ ᱦᱟᱸᱥᱫᱟ ᱫᱚ ᱯᱩᱭᱞᱩ ᱨᱮ ᱩᱯᱚᱡᱮᱞᱟ ᱥᱟᱥᱛᱷᱚ ᱠᱮᱱᱫᱨᱚ ᱟᱨ ᱚᱱᱟ ᱛᱟᱭᱚᱢ ᱱᱟᱯᱟᱭ ᱛᱤᱠᱪᱷᱟᱹ ᱞᱟᱹᱜᱤᱫ ᱥᱚᱦᱤᱫᱽ ᱡᱤᱭᱟᱣᱩᱨ ᱨᱚᱦᱚᱢᱟᱱ ᱢᱮᱹᱰᱤᱠᱮᱞ ᱦᱟᱥᱯᱟᱛᱟᱞ ᱨᱮ ᱨᱮᱯᱷᱟᱨ ᱦᱩᱭ ᱞᱮᱱ ᱛᱟᱦᱮᱱᱟ ᱾
ᱵᱨᱤᱴᱤᱥ ᱥᱚᱨᱮᱱᱟᱜ ᱞᱟᱹᱭ ᱚᱱᱟ ᱠᱚ ᱜᱷᱚᱴᱚᱱ ᱛᱟᱭᱚᱢ ᱵᱮᱲᱟ ᱑᱒ ᱴᱟᱲᱟᱝ ᱚᱠᱛᱚ ᱪᱮᱭᱟᱨᱢᱮᱱ ᱨᱮᱱ ᱚᱱᱩᱜᱟᱢᱤ ᱒᱐ ᱠᱷᱚᱱ ᱒᱕ ᱞᱮᱠᱟ ᱦᱚᱲ ᱤᱧ ᱟᱹᱞᱩ ᱵᱟᱲᱜᱮ ᱨᱮ ᱠᱟᱹᱢᱤ ᱚᱠᱛᱚ ᱠᱚ ᱞᱟᱜᱟ ᱞᱤᱫᱤᱧᱟ ᱾ ᱢᱮᱱᱠᱷᱟᱱ ᱧᱤᱫᱟᱹ ᱵᱮᱲᱟ ᱟᱡ ᱜᱚᱜᱚ ᱧᱮᱞ ᱞᱟᱹᱜᱤᱫ ᱦᱟᱥᱯᱟᱛᱟᱞ ᱛᱮᱭ ᱪᱟᱞᱟᱣ ᱞᱮᱱ ᱠᱷᱟᱱ ᱧᱤᱫᱟᱹ ᱑᱑ ᱵᱟᱡᱟᱜ ᱚᱠᱛᱚ ᱵᱟᱰᱟᱭ ᱠᱮᱫᱟᱭ ᱵᱟᱝᱢᱟ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢ ᱨᱮᱱ ᱦᱚᱲ ᱦᱮᱡ ᱠᱟᱛᱮᱫ ᱟᱡᱟᱜ ᱚᱲᱟᱜ ᱨᱮ ᱥᱮᱸᱜᱮᱞ ᱠᱚ ᱫᱷᱚᱨᱟᱣ ᱟᱠᱟᱫ ᱛᱟᱦᱮᱱᱟ ᱾
ᱚᱱᱟ ᱜᱷᱚᱴᱚᱱ ᱤᱫᱤ ᱠᱟᱛᱮᱫ ᱚᱵᱷᱤᱡᱩᱠᱛᱚ ᱪᱮᱭᱟᱨᱢᱮᱱ ᱨᱚᱯᱷᱤᱠᱩᱞ ᱤᱥᱞᱟᱢᱟᱜ ᱞᱟᱹᱭ ᱛᱷᱟᱹᱱᱤᱛ ᱟᱵᱽᱫᱩᱞ ᱢᱟᱞᱮᱠ ᱧᱩᱛᱩᱢᱟᱱ ᱢᱤᱫ ᱫᱤᱠᱩ ᱴᱷᱮᱱ ᱠᱷᱚᱱ ᱒᱐᱐᱑ ᱥᱟᱹᱦᱤᱛ ᱨᱮ ᱑᱖ ᱥᱚᱛᱚᱠ ᱵᱟᱲᱜᱮᱹᱭ ᱠᱤᱨᱤᱧ ᱞᱮᱫ ᱛᱟᱦᱮᱱᱟ ᱾ ᱟᱨ ᱚᱱᱟ ᱡᱚᱢᱤ ᱨᱮᱜᱮ ᱦᱟᱥᱟ ᱯᱮᱨᱮᱡᱼᱮ ᱪᱟᱞᱟᱣ ᱞᱮᱱ ᱠᱷᱟᱱ ᱵᱨᱤᱴᱤᱥ ᱥᱚᱨᱮᱱ ᱥᱟᱶᱛᱮ ᱵᱮᱥ ᱠᱤᱪᱷᱩ ᱦᱚᱲ ᱵᱟᱫᱷᱟ ᱠᱚ ᱮᱢ ᱞᱮᱠᱷᱟᱱ ᱨᱚᱯᱷᱤᱠᱩᱞ ᱨᱮᱱ ᱦᱚᱲ ᱩᱱᱠᱩ ᱠᱚ ᱞᱟᱜᱟ ᱞᱮᱫ ᱠᱚᱣᱟ ᱾ ᱪᱮᱭᱟᱨᱢᱮᱱ ᱱᱚᱣᱟ ᱦᱚᱸᱭ ᱞᱟᱹᱭ ᱟᱠᱟᱫᱟ ᱡᱮ ᱵᱟᱝᱢᱟ ᱟᱡ ᱵᱨᱤᱴᱤᱥ ᱥᱚᱨᱮᱱ ᱫᱚ ᱵᱟᱝᱼᱮ ᱫᱟᱞ ᱟᱠᱟᱫᱮᱭᱟ ᱾
