ᱯᱩᱥᱯᱟ ᱒ ᱨᱮᱱᱟᱜ ᱯᱨᱤᱢᱤᱭᱟᱨ ᱨᱮ ᱞᱮᱵᱮᱫ ᱞᱚᱴᱚᱢ ᱜᱷᱚᱴᱚᱱ ᱨᱮ ᱦᱟᱞᱮᱜᱮ ᱡᱟᱢᱤᱱᱮ ᱧᱟᱢ ᱟᱠᱟᱫᱟ ᱾ ᱟᱨ ᱱᱤᱛ ᱩᱱᱤ ᱜᱷᱟᱹᱞ ᱟᱠᱟᱱ ᱜᱤᱫᱟᱹᱨ ᱧᱮᱞ ᱞᱟᱹᱜᱤᱫ ᱦᱟᱭᱫᱨᱟᱵᱟᱫᱽ ᱨᱮᱱᱟᱜ ᱠᱮᱹᱟᱭᱹᱮᱢᱹᱮᱥ ᱦᱟᱥᱯᱟᱛᱟᱞᱮ ᱥᱮᱱᱮᱱᱟ ᱮᱠᱴᱚᱨ ᱟᱞᱞᱩ ᱚᱨᱡᱩᱱ ᱾
ᱵᱟᱞᱮ ᱢᱟᱦᱟ ᱥᱮᱛᱟᱜ ᱵᱮᱲᱟ ᱟᱭᱢᱟ ᱵᱷᱤᱰᱤᱭᱳ ᱟᱨ ᱪᱤᱛᱟᱹᱨ ᱯᱟᱥᱱᱟᱣᱟᱠᱟᱱᱟ ᱾ ᱚᱱᱟᱨᱮ ᱟᱞᱞᱩ ᱦᱟᱥᱯᱟᱛᱟᱞ ᱨᱮ ᱵᱚᱞᱚᱱᱮ ᱧᱮᱞ ᱟᱠᱟᱱᱟ ᱾ ᱟᱞᱞᱩ ᱦᱤᱡᱩᱜ ᱢᱟᱲᱟᱝ ᱦᱟᱥᱯᱟᱛᱟᱞ ᱨᱮᱱᱟᱜ ᱥᱤᱠᱩᱨᱤᱴᱤ ᱵᱮᱵᱚᱥᱛᱷᱟ ᱠᱚ ᱠᱮᱴᱮᱡ ᱟᱠᱟᱫᱟ ᱾ ᱯᱟᱨᱚᱢᱮᱱ ᱕ ᱡᱟᱱᱩᱣᱟᱨᱤ ᱥᱨᱤ ᱛᱮᱡᱟ ᱧᱩᱛᱩᱢᱟᱱ ᱩᱱᱤ ᱜᱤᱫᱟᱹᱨ ᱧᱮᱞ ᱥᱮᱱᱚᱜ ᱨᱮᱱᱟᱜ ᱠᱟᱛᱷᱟ ᱛᱟᱦᱮᱸ ᱠᱟᱱᱟ ᱟᱞᱞᱩ ᱚᱨᱡᱩᱱᱟᱜ ᱾ ᱢᱮᱱᱠᱷᱟᱱ ᱚᱱᱟ ᱯᱞᱮᱱ ᱢᱩᱪᱟᱹᱫ ᱦᱟᱹᱵᱤᱡ ᱵᱟᱹᱛᱤᱞ ᱦᱩᱭ ᱟᱠᱟᱱᱟ ᱾ ᱵᱟᱞᱮ ᱢᱟᱦᱟ ᱟᱞᱞᱩ ᱚᱨᱡᱩᱱᱟᱜ ᱦᱚᱨᱚᱜ ᱨᱮ ᱛᱟᱦᱮᱸ ᱠᱟᱱᱟ ᱦᱟᱹᱲᱭᱟᱹᱨ ᱥᱳᱭᱮᱴᱟᱨ ᱟᱨ ᱡᱤᱱᱥ ᱾ ᱟᱞᱞᱩ ᱚᱨᱡᱩᱱ ᱢᱤᱫ ᱡᱷᱟᱞᱟᱠ ᱧᱮᱞ ᱞᱟᱹᱜᱤᱫ ᱦᱟᱥᱯᱟᱛᱟᱞ ᱵᱟᱦᱨᱮ ᱨᱮᱦᱚᱸ ᱯᱷᱮᱱ ᱠᱚᱣᱟᱜ ᱵᱷᱤᱲ ᱧᱮᱞᱧᱟᱢ ᱟᱠᱟᱱᱟ ᱢᱮᱫ ᱨᱮ ᱞᱟᱜᱟᱜ ᱞᱮᱠᱟ ᱾
ᱯᱟᱨᱚᱢᱮᱱ ᱔ ᱰᱤᱥᱮᱹᱢᱵᱚᱨ ᱦᱟᱭᱫᱨᱟᱵᱟᱫᱽ ᱨᱮᱱᱟᱜ ᱥᱚᱱᱫᱷᱟ ᱛᱷᱤᱭᱮᱴᱟᱨ ᱨᱮ ‘ᱯᱩᱥᱯᱟ ᱒ᱺ ᱫᱟ ᱨᱩᱞ’ ᱥᱤᱱᱮᱹᱢᱟ ᱨᱮᱱᱟᱜ ᱯᱨᱤᱢᱤᱭᱟᱨ ᱨᱮ ᱫᱩᱨᱜᱷᱚᱴᱚᱱᱟ ᱜᱷᱚᱴᱟᱣ ᱟᱠᱟᱱᱟ ᱾ ᱧᱤᱫᱟᱹ ᱤᱨᱟᱹᱞ ᱵᱟᱡᱟᱜ ᱥᱮᱫ ᱛᱷᱤᱭᱮᱴᱟᱨ ᱨᱮ ᱟᱞᱞᱩ ᱚᱨᱡᱩᱱ ᱥᱮᱴᱮᱨ ᱥᱟᱶᱛᱮ ᱵᱷᱤᱲ ᱵᱟᱹᱲᱛᱤ ᱞᱮᱱᱟ ᱾ ᱚᱱᱟ ᱵᱷᱤᱲ ᱨᱮᱱᱟᱜ ᱴᱷᱮᱞᱟᱴᱷᱤᱞᱤᱛᱮ ᱓᱕ ᱥᱮᱨᱢᱟ ᱩᱢᱮᱨᱟᱱ ᱢᱤᱫ ᱛᱤᱨᱞᱟᱹ ᱠᱚ ᱞᱮᱵᱮᱫ ᱜᱚᱡ ᱟᱠᱟᱫᱮᱭᱟ ᱾ ᱜᱷᱟᱹᱞ ᱞᱮᱱᱟᱭ ᱩᱱᱤ ᱨᱮᱱ ᱤᱨᱟᱹᱞ ᱥᱮᱨᱢᱟ ᱩᱢᱮᱨ ᱨᱮᱱ ᱢᱤᱫ ᱜᱤᱫᱽᱨᱟᱹ ᱾ ᱚᱱᱟ ᱜᱷᱚᱴᱚᱱ ᱛᱟᱭᱚᱢ ᱜᱮ ᱜᱨᱮᱹᱯᱷᱛᱟᱨ ᱞᱮᱱᱟᱭ ᱟᱞᱞᱩ ᱚᱨᱡᱩᱱ ᱾ ᱞᱳᱣᱟᱨ ᱠᱳᱨᱴ ᱠᱷᱚᱱ ᱡᱮᱹᱞ ᱦᱮᱯᱷᱟᱡᱚᱛ ᱨᱮᱱᱟᱜ ᱟᱸᱫᱮ ᱠᱚ ᱮᱢ ᱞᱮᱫᱟ ᱾ ᱛᱟᱭᱚᱢ ᱛᱮ ᱛᱮᱹᱞᱮᱹᱝᱜᱟᱱᱟ ᱦᱟᱭᱠᱳᱨᱴ ᱠᱷᱚᱱ ᱡᱟᱢᱤᱱᱮ ᱧᱟᱢ ᱟᱞᱞᱩ ᱾
ᱚᱱᱟ ᱢᱟᱲᱟᱝ ᱨᱮᱜᱮ ᱥᱟᱣᱩᱛᱷ ᱥᱩᱯᱟᱨᱥᱴᱟᱨ ᱞᱟᱹᱭ ᱟᱠᱟᱫᱟᱭ ᱩᱱᱤ ᱜᱤᱫᱟᱹᱨᱟᱜ ᱵᱩᱜᱤᱼᱵᱟᱹᱲᱤᱡ ᱥᱮᱫ ᱱᱚᱡᱚᱨᱮ ᱫᱚᱦᱚ ᱟᱠᱟᱫᱟ ᱾ ᱮᱢᱚᱱ ᱪᱮᱫ ᱩᱱᱤ ᱨᱮᱱ ᱜᱷᱟᱨᱚᱸᱡᱽ ᱦᱚᱲ ᱥᱟᱶᱦᱚᱸ ᱧᱟᱯᱟᱢᱮ ᱠᱷᱚᱡᱽ ᱞᱮᱱᱟ ᱾ ᱛᱚᱵᱮ ᱟᱭᱤᱱᱤ ᱡᱚᱴᱤᱞᱚᱛᱟ ᱠᱷᱟᱹᱛᱤᱨ ᱵᱟᱝ ᱦᱩᱭ ᱟᱠᱟᱱᱟ ᱾
ᱯᱟᱨᱚᱢᱮᱱ ᱒᱔ ᱰᱤᱥᱮᱹᱢᱵᱚᱨ ᱥᱨᱤ ᱛᱮᱹᱡᱟ ᱟᱡ ᱵᱟᱵᱟ ᱵᱷᱟᱥᱠᱚᱨᱮ ᱞᱟᱹᱭ ᱟᱠᱟᱫᱟ, ᱒᱐ ᱢᱟᱦᱟ ᱛᱟᱭᱚᱢ ᱩᱱᱤ ᱨᱮᱱ ᱜᱤᱫᱟᱹᱨ ᱴᱨᱤᱴᱢᱮᱱᱴ ᱨᱮ ᱨᱮᱥᱯᱚᱱᱥ ᱟᱠᱟᱫᱟᱭ ᱾
