FIR IN JADAVPUR CASE : ᱡᱟᱫᱚᱵᱽᱯᱩᱨ ᱢᱟᱢᱞᱟ ᱨᱮ ᱦᱩᱭ ᱮᱱᱟ FIR, FIR ᱨᱮ ᱵᱨᱟᱛᱛᱚ ᱵᱚᱥᱩ ᱟᱨ ᱳᱢᱯᱨᱚᱠᱟᱥ ᱢᱤᱥᱨᱚ ᱥᱟᱶᱛᱮ ᱓ ᱦᱚᱲ ᱣᱟᱜ ᱧᱩᱛᱩᱢ

FIR IN JADAVPUR CASE : ᱢᱚᱬᱮ ᱢᱟᱦᱟ ᱛᱟᱭᱚᱢ ᱡᱟᱫᱚᱵᱽᱯᱩᱨ ᱨᱮᱱᱟᱜ ᱠᱮᱥ ᱨᱮ ᱮᱯᱷ ᱟᱭᱟᱨ ᱯᱷᱟᱭᱤᱞ ᱦᱩᱭᱮᱱᱟ ᱾ FIR ᱨᱮ ᱥᱮᱪᱮᱫ ᱢᱚᱱᱛᱨᱤ ᱵᱨᱟᱛᱛᱚ ᱵᱚᱥᱩ(BRATYA BASU), ᱯᱨᱚᱯᱷᱮᱥᱟᱨ ᱳᱢᱯᱨᱚᱠᱟᱥ ᱢᱤᱥᱨᱚ (OM PRAKASH MISHRA) ᱟᱨ ᱥᱮᱪᱮᱫ ᱢᱚᱱᱛᱨᱤ ᱨᱮᱱ ᱰᱨᱟᱭᱵᱷᱟᱨᱼᱟᱜ ᱧᱩᱛᱩᱢ ᱢᱮᱱᱟᱜᱼᱟ ᱾ ᱵᱟᱰᱟᱭ ᱛᱮᱭᱟᱜ ᱠᱟᱛᱷᱟ, ᱦᱚᱲ ᱠᱚ ᱜᱚᱡᱽ ᱨᱮᱭᱟᱜ ᱠᱩᱨᱩᱢᱩᱴᱩ ᱨᱮ ᱢᱟᱢᱞᱟ ᱫᱚ ᱫᱟᱭᱮᱨ ᱦᱩᱭ ᱟᱠᱟᱱᱟ᱾ 
ᱪᱟᱞᱟᱣᱮᱱ ᱑ ᱢᱟᱨᱪ ᱨᱮ, ᱡᱟᱫᱚᱵᱽᱯᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱳᱭᱮᱵᱽᱠᱩᱯᱟᱨ ᱨᱮᱭᱟᱜ ᱥᱮᱨᱢᱟᱠᱤᱭᱟᱹ ᱢᱤᱴᱤᱝ ᱛᱟᱦᱮᱸ ᱠᱟᱱᱟ ᱾ᱞᱟᱞᱤᱥ ᱟᱠᱟᱱᱟ ᱡᱮ, ᱤᱱᱟᱸ ᱦᱤᱞᱳᱜ ᱵᱟᱢ ᱯᱟᱹᱴᱷᱩᱣᱟᱹ ᱠᱚ ᱵᱟᱝᱢᱟ ᱥᱮᱛᱟᱜ ᱠᱷᱚᱱ ᱜᱮ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱚᱥᱟᱸᱛᱤ ᱵᱮᱱᱟᱣ ᱨᱮᱭᱟᱜ ᱠᱚ ᱠᱩᱨᱩᱢᱩᱴᱩ ᱞᱮᱫᱟ᱾ ᱥᱤᱸᱜᱟᱹᱲ ᱵᱮᱲᱟ ᱨᱮᱫᱚ, ᱚᱱᱟ ᱨᱮᱱᱟᱜ ᱚᱵᱚᱥᱛᱟ ᱫᱚ ᱩᱛᱞᱟᱹᱣ ᱨᱟᱠᱟᱵᱽ ᱮᱱᱟ ᱾ ᱟᱨ ᱚᱱᱟ ᱨᱮᱭᱟᱜ ᱚᱨᱥᱚᱝ ᱛᱮ ᱡᱟᱫᱚᱵᱽᱯᱩᱨ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱢᱮᱱᱟᱜ ᱛᱨᱤᱱᱢᱩᱞ ᱥᱤᱠᱠᱷᱟᱵᱚᱱᱫᱷᱩ ᱥᱚᱢᱤᱛᱤ ᱣᱟᱜ ᱚᱯᱷᱤᱥ ᱦᱚᱸ ᱨᱟᱯᱩᱫ ᱞᱮᱫᱟᱠᱚ ᱵᱟᱢ ᱯᱟᱹᱴᱷᱩᱣᱟᱹ ᱜᱚᱢᱚᱴᱚᱱ ᱠᱚ᱾ ᱟᱨᱦᱚᱸ ᱥᱮᱸᱜᱮᱞ ᱠᱚ ᱞᱟᱜᱟᱣ ᱟᱛ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱥᱟᱢᱩᱝ ᱫᱚ ᱵᱟᱝ ᱥᱮᱪᱮᱫ ᱢᱚᱱᱛᱨᱤ ᱵᱨᱚᱛᱛᱚ ᱵᱚᱥᱩ(BRATYA BASU) ᱚᱱᱰᱮᱭ ᱥᱮᱴᱮᱨ ᱞᱮᱱ ᱠᱷᱟᱱ ᱩᱱᱤᱭᱟᱜ ᱜᱟᱹᱰᱤ ᱪᱟᱠᱟ ᱨᱮᱭᱟᱜ ᱦᱟᱣᱟ ᱦᱚᱸ ᱡᱷᱤᱡ ᱦᱩᱭ ᱞᱮᱱ ᱛᱟᱦᱮᱱᱟ᱾ ᱟᱨ ᱴᱷᱮᱞᱟᱴᱷᱤᱞᱤ ᱞᱮᱠᱟᱛᱮ ᱥᱮᱪᱮᱛ ᱢᱚᱱᱛᱨᱤ ᱫᱚ ᱪᱳᱴᱼᱮ ᱧᱟᱢ ᱟᱠᱟᱫᱟ᱾ ᱥᱮᱪᱮᱫ ᱢᱚᱱᱛᱨᱤ ᱣᱟᱜ ᱜᱟᱹᱰᱤ ᱛᱮ ᱛᱮᱱ ᱠᱟᱛᱮᱡ ᱜᱷᱟᱹᱞ ᱟᱠᱟᱱᱟ ᱱᱟᱭ ᱡᱟᱫᱚᱵᱽᱯᱩᱨ ᱵᱤᱨᱫᱟᱹᱜᱟᱲ ᱨᱮᱱ ᱯᱟᱹᱴᱷᱩᱣᱟᱹ ᱤᱱᱫᱨᱟᱱᱩᱡ ᱾ᱛᱟᱭᱚᱢ ᱛᱮ ᱡᱟᱫᱚᱵᱽᱯᱩᱨ ᱛᱷᱟᱱᱟ ᱨᱮ ᱞᱟᱞᱤᱥᱼᱮ ᱥᱮᱱ ᱞᱮᱱ ᱯᱩᱞᱤᱥ ᱴᱷᱮᱱ,ᱚᱱᱟ ᱞᱟᱞᱤᱥ ᱫᱚ ᱵᱟᱝ ᱠᱚ ᱦᱟᱛᱟᱣ ᱟᱠᱟᱫᱟ ᱾ ᱚᱱᱟ ᱛᱟᱭᱚᱢ ᱠᱚᱞᱠᱟᱛᱟ ᱦᱟᱭ ᱠᱳᱨᱴ ᱫᱚ ᱥᱟᱹᱜᱩᱱ ᱢᱟᱦᱟ ᱦᱤᱞᱳᱜ ᱯᱩᱞᱤᱥ ᱠᱚ ᱵᱷᱚᱨᱛᱥᱚᱱᱟ ᱠᱮᱫ ᱠᱚᱣᱟ ᱾ ᱟᱨ ᱵᱤᱪᱟᱹᱨᱤᱭᱟᱹ ᱦᱚᱸ ᱠᱩᱠᱞᱤ ᱠᱮᱫᱟ ᱡᱮ ᱤᱱᱫᱽᱨᱟᱱᱩᱡ ᱨᱟᱭ ᱵᱤᱨᱩᱫᱷ ᱨᱮ ᱪᱮᱫᱟᱜ ᱮᱯᱷ ᱟᱭᱟᱨ ᱵᱟᱝ ᱯᱷᱟᱭᱤᱞ ᱞᱮᱱᱟ ?
ᱥᱟᱹᱜᱩᱱ ᱢᱟᱦᱟ ᱦᱤᱞᱳᱜ ᱵᱤᱪᱟᱹᱨᱤᱭᱟᱹ ᱫᱚ ᱢᱮᱱ ᱠᱮᱫᱟᱭ, “ᱡᱟᱦᱟᱸ ᱫᱚ ᱯᱩᱞᱤᱥ ᱢᱤᱫ ᱯᱟᱦᱴᱟ ᱛᱮ ᱛᱚᱞᱟᱥ ᱠᱚ ᱪᱟᱵᱟ ᱠᱮᱫᱟ᱾ ᱢᱮᱱᱠᱷᱟᱱ ᱯᱚᱱᱚᱛᱼᱟᱜ ᱫᱚ ᱢᱤᱫ ᱟᱯᱟᱛᱟ ᱞᱮᱠᱟ ᱵᱮᱣᱦᱟᱨ ᱨᱮᱱᱟᱜ ᱞᱟᱹᱠᱛᱤ ᱛᱟᱦᱮᱸ ᱠᱟᱱᱟ ᱾” ᱦᱟᱭ ᱠᱳᱨᱴ ᱫᱚ ᱱᱚᱶᱟ ᱨᱮᱱᱟᱜ ᱠᱟᱹᱢᱤ ᱧᱮᱞᱛᱮ ᱵᱷᱚᱨᱛᱥᱚᱱᱟ ᱠᱟᱛᱮ ᱜᱮ ᱡᱟᱫᱚᱵᱽᱯᱩᱨ ᱠᱮᱥ ᱨᱮᱭᱟ ᱮᱯᱷ ᱟᱭᱟᱨ ᱯᱷᱟᱭᱤᱞ ᱦᱩᱭ ᱞᱮᱱᱟ ᱾ ᱮᱛᱚᱦᱚᱵ ᱨᱮ ᱵᱟᱰᱟᱭ ᱧᱟᱢ ᱞᱮᱱᱟ ᱡᱮ, ᱦᱚᱲ ᱠᱚ ᱜᱚᱡᱽ ᱨᱮᱭᱟᱜ ᱪᱮᱥᱴᱟ ᱞᱟᱹᱭ ᱛᱮᱜᱮ ᱯᱩᱞᱤᱥ ᱫᱚ ᱢᱟᱢᱞᱟ ᱠᱚ ᱫᱟᱭᱮᱨ ᱞᱮᱫᱟ ᱾